Ang Cebu City Traffic Management Coordination Committee napugos sa pagtak-op sa gap nga gigamit nga U-turn slot atubangan sa usa ka mall sa may Cebu South Coastal Road (CSCR) human nanawagan ang mga tiggamit sa social media nga sirad-an kini human sa aksidente sa sakyanan nga nahitabo sa lugar sa Mayo 25, 2023.
Pipila ka netizens ang nihangyo sa Cebu City Transportation Office nga paundangon na ang mga drayber sa paggamit niini isip U-turn slot aron malikayan ang dugang mga disgrasya.
Ang mga sakop sa komitiba, human nasayod sa mulo sa mga netizen, naaghat sa pagmando sa CCTO sa pagpatuman sa pagsira sa gamay nga gap sa SRP ug El Pardo T-intersection uban sa pagluwat sa Resolution No 37-098-2023 nga gipetsahan og Mayo 16, 2023.
Ang resolusyon nagdili sa tanang pagtabok sa crossing hangtod nga dili pa mabutang ang traffic lights sa nahisgutang lugar. Giangkon sa TMC-Com nga ang pagbukas nakahatag og hulga sa tanang motorista ug tiggamitan sa kadalanan sa mao nga dapit.
Apan, ang abogado nga si Kent Francesco Jongoy, TMC-Com secretary, nangatarungan nga kini nga pag-abli wala gidesinyo alang sa U-turn, apan agianan padulong sa El Pardo Road.
Matod pa ni Jongoy nga adunay kalagmitan nga ang mga tawo makalapas sa traffic rules and regulations ilabi na kon walay nag-regulate sa lugar.
Nangatarungan siya nga walay gitahasan nga modumala sa maong dapit tungod kay dili man kini makonsiderar nga intersection.
Siya nipasalig nga dunay gitahasan nga mga enforcer nga momonitor sa maong dapit.
Dugang pa niya nga delikado sa disgrasya ang maong lugar tungod kay dili luwas likuan. (AML)