Ang mga habalhabal o motorcycle-for-hire riders ug commuters sa dakbayan sa Mandaue uyon apan dunay kabalaka sa balaudnon nga mag-legalize sa mga motorsiklo isip public utility vehicles (PUVs), kansang sugyot gituki sa Senado.
Samtang ang uban miuyon sa pagsiguro sa kaluwasan sa mga pasahero, ang ubang riders nahadlok nga adunay mas estrikto nga mga palisiya sa pagpasakay nga mahimong makabalda sa ilang oras sa pagtrabaho ug kita.
Kini samtang gipaambit nila ang ilang mga sentimento sa usa ka interbyo kaniadtong Biyernes Mayo 26, 2023.
Si Rafael Bongo, 28, habalhabal rider nga taga Barangay Mantuyong ug sakop sa Mantuyong Black Eagle Riders, niingon nga uyon siya nga himuong legal ang habalhabal aron makatabang sila nga makadugang og kita.
“Para dili na magkalisud og pangita og kwarta kay makasu’d gawas ang habal-habal ba labi nas bukid kay numero uno gyud na gawas sauna ang habalhabal gyud, sa mga probinsya, sa bukid”, matod ni Bongo.
Matod ni Bongo nga mokita siya og P500 matag magdrayb sa iyang motorsiklo for hire, nipasabot nga ang kantidad igo na nga makapakaon sa iyang pamilya katulo sa usa ka adlaw.
Gitataw usab niya nga ang kaluwasan sa iyang mga pasahero ang unahon sa higayon nga maaprobahan na ang balaudnon.
Si Jason Tarona, 39, sakop sa Zamora Riders, taga Barangay Opao, uyon usab nga himuong legal ang habalhabal apan nagdumili siya pagparehistro sa iyang sakyanan sa bisan unsang lehitimong riding company nga iyang gikahadlukan nga malakip sa proposal.
“Uyon mi anang ma legal na among habal-habal diri pero dili sad mi mosugot nga iadto mi legal kay iadto ug Angkas, amo lang ang amoa diri ma legalized ang among grupo”, matod ni Tarona.
Gipasabot ni Tarona nga nahadlok sila nga ang ride hailing operator ang magbuot sa ilang oras kay gusto nila nga sama karon, sila ang nagbuot.
Matod ni Tarona nga mokita siya og P500-P900 matag mogamit sa iyang habal-habal. Apan silang Bongo ug Tarona nagkauyon nga kon ang gobyerno mopatuman og fix nga plete, ila kining sundon.
ARON DI PAHIMUSLAN
Sa buwag nga pakighinabi, ang commuter nga si Kath Mendoza, 32, taga Barangay Centro nga nagtrabaho sa usa ka call center sa dakbayan sa Sugbo, niingon nga kinahanglang i-legalize ang habalhabal aron walay rider nga mangayo kanila og dakong bayad.
Giasoy ni Mendoza ang iyang kasinatian sa mga sumasakay sa habalhabal nga nagpahimulos sa pagpangayo sa ilang mga pasahero og mahal nga plete. (HIC)