Cebuana artist nga gikiha kaniadto ni anhing mayor Edgardo Labella tungod sa iyang social media post dihang grabe pa ang pandemic, gidakop sa kapulisan niadtong Biyernes sa hapon, Mayo 26, 2023 sulod sa iyang balay sa Gorordo Avenue, dakbayan sa Sugbo base sa warrant of arrest nga giluwatan sa korte.
Nakahigda og usa ka gabii sa bilanggoan sa buhatan sa Criminal Investigation and Detection Group (CIDG) Cebu Provincial Field Unit sa Camp Sotero Cabahug sa Gorordo Ave. si Maria Victoria Burdeos Beltran, alyas Bambi, 62.
Hinuon nakapiyansa og P36,000 sa kasong wa siya masayod kon unsa busa nakagawas siya sa udto sa Sabado, Mayo 27.
Ang warrant of arrest giluwatan ni Cebu City Regional Trial Court (RTC) Branch 14 Judge Merlo Pasko Baganao sa kasong unlawful use of means of publication and unlawful utterances nga kalapasan sa Article 154 sa Revised Penal Code, in relation to Republic Act 10175 nga mas naila nga Cybercrime Prevention Act of 2012.
HITABO
Sukwahi sa spot report sa CIDG, si Beltran nga niasoy sa hitabo pinaagi sa usa ka pamahayag nga iyang gipadala sa SunStar Cebu sa Sabado sa hapon, alas 4 sa hapon sa Mayo 26, dunay niabot nga duha ka mga polis nga sakop sa CIDG.
“Mga alas 4 sa hapon, niabot ang duha ka police sa CIDG nga nagdala og warrant of arrest. Ila kuno kong dal-on sa opisina kay i-process. Nitawag ko sa akong abogado unya giingnan ko nga mokuyog kay naay warrant of arrest. Nakalapas kuno ko sa unlawful use of publication ug unlawful utterances. Nikuyog na lang ko sa ila,” asoy ni Beltran.
Naglisod siya sa pagpiyansa tungod kay weekend, tunga sa adlaw ra kutob ang korte ug way opisina ang mga barangay official sa Kamputhaw sa Sabado.
Apan gitabangan siya og maayo sa iyang abogado nga si manlalaban Amando Virgil Ligutan aron mahuman og process ang tanang mga dokumento.
“Sa tabang ni Atty. Ligutan, nahangyo namo ang barangay kapitan sa Kamputhaw. Gigukod mi sa oras kay lagi, tunga sa adlaw ra man abri ang korte,” dugang asoy ni Beltran.
Niadtong Abril 2020, si Beltran gikiha ni Labella tungod sa iyang social media post kalabot sa Covid-19 situation sa sityo Zapatera, Brgy. Luz, dakbayan sa Sugbo.