Managsuon nga nagdali sa pagpauli sa ilang dapit sa lungsod sa Argao, habagatang Sugbo, nabangga sa usa ka trak nga nikalit og liko sa ilang lane mga alas 9 pasado sa Biyernes sa gabii, Mayo 26, 2023, sa national highway sa Brgy. Simala, lungsod sa Sibonga.
Ang biktima nga namtay samtang nagpadulong pa sa tambalanan giilang si Geno Relacion, 30, ulitawo, utility worker sa Philippine Science High School- Argao campus, taga Brgy. Langtad, lungsod sa Argao.
Siya nagmaniho sa iyang Honda XRM nga motorsiklo.
Naangol ang iyang maguwang nga si Aljohn Relacion, 32, ulitawo, kinsa nagmaneho sa laing motorsiklo.
Gitanggong sa kapulisan sa Sibonga si Jaime Pasculado Lanojan, hingkod, taga Brgy. Lamac, Dumanjug, driver sa Isuzu Elf flat truck nga gipanag-iya sa WM Builders.
Si Police Senior Master Sgt. Gerardo Abad, imbestigador sa Sibonga Police Station nga nahinabi sa Superbalita Cebu sa Sabado, Mayo 27, nagkanayon nga ang mga biktima gikan nibisita sa ilang igsuon nga nagpuyo sa Brgy. Poblacion, lungsod sa Sibonga.
Ang managsuong Relacion gikataho nga dunay igong gikusgong nakapadagan sa ilang motorsiklo base sa sulti sa mga saksi nga nahinabi sa kapulisan.
Sa pag-abot sa lugar, wala sila nakabantay sa trak nga kalit nga niliko sa wala paingon sa ilang lane.
Wala nila nakita ang trak kay nakaali ang nabundo nga dalan sa unahan sa taytayan tungod sa gipahigayong pag-ayo.
Gumikan sa kakalit sa panghitabo, wala maka-brake ang mga biktima.
“Kalit kaayong panghitabo. Dili man makita kon dunay sakyanan kay murag nabuktot ang karsada,” paghulagway ni Abad.
Ang mga biktima gidali sa pagdala sa community hospital sa lungsod.
Si Geno nga grabe gidali sa pagdala sa tambalanan sa dakbayan sa Sugbo, apan namatay samtang nagpadulong pa.
Ang maguwang gipaubos sab sa CT scan aron masuta kon duna ba say internal nga mga kadaut. Gitanggong si Lanojan samtang giandam ang tukmang kaso nga ipasaka batok kaniya. (GPL)