Naluwas na sab gikan sa kuhit sa panamilit ang Boston Celtics human nakapuntos og buzzer-beater putback shot si Derrick White nga nagpadaog kanila batok sa host Miami Heat, 104-103, sa grabe ka kulbahinam nga Game 6 sa Eastern Conference finals series sa National Basketball Association (NBA) ning Dominggo, Mayo 28, 2023 (PH time).
Ang kadaugan maoy nakapugos og deciding Game 7 sa series.
“Derrick White, like a flash of lightning, just came out of nowhere and saved the day, man,” matod ni Celtics forward Jaylen Brown. “An incredible play.”
Ang Celtics nagkinahanglan na lang og usa ka daog aron mahimong labing unang team sa kasaysayan nga hingpit nga makabangon gikan sa 0-3 nga biya sa series.
Nag-ung-ong na unta ang Miami Heat sa pultahan sa NBA Finals dihang kalmadong napasulod ni Jimmy Butler ang iyang tulo ka freethrows sa nahabiling tulo ka mga segundos nga maoy naghatag sa No. 8 squad og 103-102 nga labaw.
Human niini, nitawag og timeout si Celtics coach Joe Mazzulla.
Pagbalik sa aksyon, nitira og three-point shot si Celtics guard Marcus Smart gikan sa inbound pass apan nasipyat unya daw sa usa lang ka pamilok sa mata, kalit lang nibutho sa ilawom nga bahin si White aron mugnaon ang mabayanihon niyang puntos.
Gi-review una sa mga referee sa video replay ang maong itsa ni White una nila kini gi-counted.
“Ball came to me. I made the shot,” asoy ni White, nga nahimong ikaduhang magduduwa sa kasaysayan sa NBA sunod ni Michael Jordan nga nakapasulod og buzzer-beater nga nakaluwas sa usa ka team gikan sa kuhit sa panamilit.
“I was just happy. Season was on the line. We don’t want to go home,” dugang ni White, kinsa niamot og 11 puntos sa kadaugan.
Ang Celtics mao pa lang ang ikaupat nga team nga nakapugos og deciding Game 7 human nabiyaan og 0-3 sa series.
Gipangulohan ni Jayson Tatum ang Celtics pinaagi sa iyang 31 puntos, nidugang og 26 puntos si Brown samtang nihatag og 21 puntos si Smart.
Ang Heat gipangulohan ni Butler pinaagi sa iyang 24 puntos, nitunol og 21 puntos si Caleb Martin samtang nitampo og 15 puntos si Gabe Vincent.
Ang series mobalik sa korte sa Celtics karong Martes, Mayo 30, 2023.
“I don’t know how we’re going to get this done, but we’re going to go out there and get it done,” asoy ni Miami coach Spoelstra. “And that’s what the next 48 hours is about.” / AP