Human mipagawas og laing kamandoan si Police General Benjamin Acorda Jr. sa tanang polis sa tibuok Pilipinas labot sa “No Take Policy” gikan sa illegal gambling ug illegal drugs, ang Police Regional Office (PRO 7) subling mopahinumdom sa ilang mga personnel bahin niini.
Matod ni Police Lieutenant Colonel Gerard Ace Pelare, ang spokesperson ni Police Brigadier General Anthony Aberin, dili na bag-o sa PRO 7 ang maong kamandoan.
Iyang gipasabot nga atol sa paglingkod sa katungdanan ni Aberin sa PRO 7 gimando na niya kini sa tanan nga dili modawat og kwarta gikan sa illegal nga sugal ug drugas. Bug-at nga silot ang atubangon sa usa ka police personnel kon mamatud-an nga naghimo niini.
Gumikan niini, gimandoan karon ang tanang station commanders sa tibuok rehiyon 7 nga molusad og honest to goodness anti-illegal gambling operations.
“Naa man tay daghang policy na no, penalty neglect of duty ba karon nga kon mamatud-an nga bisan sa ilang kahibalo nga naay illegal gambling sa ilang area unya wala silay gihimo, rest assured nga ang Police Regional Office 7 mo-file gyud og appropriate charges those who are remiss on their duties specifically aning "No Take Policy" ni Chief PNP,” matod ni Pelare.
Dunay unit sa Philippine National Police (PNP) nga mo-monitor sa mga polis nga nalambigit sa pagdawat sa kwarta gikan sa illegal gambling kini mao ang Integrity Monitoring and Enforcement Group IMEG, Regional Intelligence Division RID 7 ug ang Criminal Investigation and Detection Group CIDG.
Gipasigarbo hinuon ni Pelare nga dinhi sa Central Visayas matag Simultaneous Anti-Criminality and Law Enforcement Operations (Sacleo) ang dunay labing daghan nga madakpan mao ang illegal gambling.
Nagpasabot kini sigun sa police official nga wala malambigit ang kapulisan sa Central Visayas sa illegal nga sugal.
“Sa pagkakaron, ang pinaka kusog nato nga anti-criminality campaign daghan kaayo tag dakop sa illegal gambling, kini nagpamatuod lang nga ang atong unit sa ground seryuso gyud sa pag-imposar sa atong anti-gambling campaign. Kini sad usa sad ni ka manifestation nga walay police officer nga in cahoots with illegal gambling operations,” dugang ni Pelare.
Kini magpabilin, matod ni Pelare, ilabi na nga giseryuso sa Chief PNP ang illegal gambling operations sa tibuok Pilipinas.
Giawhag sa kapulisan ang publiko nga dili mo-patronize sa illegal nga sugal sama sa swertres nga wala gipadagan sa Philippine Charity Sweepstakes Office (PCSO).
Iyang gipasabot nga ang kita sa Small Town Lottery mapunta kini sa panudlanan sa gobyerno nga mao usab ang ipamalit og tambal ug mga gamit sa nagkadaiyang tambalanan.
Sukwahi sa nagpadagan sa illegal numbers game diin ang kita niini didto lamang mapunta sa bulsa sa illegal operators.
Sa probinsya sa Sugbo, duna lang usa ka legal gambling operator, kini mao ang Saturn Gaming N’Amusement Corporation gawas niini, matod ni Pelare, illegal na.
Mibalik na sa ilang operation ang Saturn Small Town Lottery (Stl0 human mipagawas og Writ of Preliminary Injunction si Judge Aileen N. Saguing-Agacita sa RTC Mandaluyong City pinetsahan niadtong Mayo 26, 2023 human gipahunong una sa PCSO tungod sa technical issues.
Sugod sa Lunes, Mayo 29, mobalik na sila sa ilang operasyon sa probinsya sa Sugbo.
Nakig-alayon ang PRO 7 sa PCSO aron masayran nila kon unsa pa kining mga illegal gambling operation sa ubang lalawigan aron matutukan nila kini pag ayo sa ilang mga personnel.