DAKO ang kalipay sa Dabawenyo human nga gianunsyo nga ablihan sa Davao City ang usa ka kidney transplant facility pinaagi sa tabang sa nasud Poland.
Kini ang usa sa mga nahisgutan atol sa courtesy call nga gihimo sa Ambassador sa Poland to the Philippines nga si His Excellency Jarosław Szcepankiewicz kang Davao City Mayor Sebastian Duterte atol sa pagbisita sa Davao City niadtong Mayo 18, 2023.
Nasayran nga kini maoy pinaka-advanced nga facility sa tibuok nasud nga modalit og serbisyo dili lang sa mga Dabawenyo apan sa tibuok Mindanao, suma ni kanhi Southern Philippines Medical Center (SPMC) Chief Dr. Leopoldo J. Vega.
Atol sa courtesy call anaa si Mark Ryan Juanitas, chief executive officer sa OneMark Engineering Technologies, Bartek Wasiewski, Miguel Santos, si kanhi Davao SPMC Chief Dr. Vega ug ang Polish Investment and Trade Agency isip Head sa Business Development Manager and Medical Adviser.
Gituyo kuno sa Poland nga sa Davao magbutang niini sanglit sentro kini kung isla sa Mindanao na ang hisgutan, samtang luwas sab suma pa ang dakbayan sa Davao ug walay angay kabalak-an.
Mapasalamaton kaayo si Mayor Baste ngadto sa gobyerno sa nasud Poland sa gidalit niini nga butang nga ikahimulos sa mga Dabawenyo.