ILHAN na ang mga suspek nga giingong nangrapido sa duha ka magtutudlo alas 11:30 sa buntag, Biyernes, Mayo 26, 2023, sa Pikit, probinsiya sa Cotabato.
Usa sa mga biktima ang napatay nga giilang si Joel Reformado, 36, minyo, nagtudlo sa Damalasak Elementary School sa Barangay Damalasak, Pikit sa maong probinsiya samtang angol si Elton John Lapined, 37, minyo, nagtudlo sa Mapagkaya Elementary School ug pulos molupyo sa Barangay Poblacion, Pikit.
Gibutyag ni Pikit chief of police Lieutenant Colonel John Miridel Calinga nga sakay ang mga biktima sa motorsiklo nga pauli na unta sa ilang gipuy-an.
Apan pag-abot nila atbang sa Manaulanan Elementary School sa Barangay Manaulanan sa maong lungsod, kalit lang mibutho ang riding in tandam suspects ug gipusil sila gamit ang kalibre .45 nga pistola kinsa abtik sab nga miikyas paingon sa hilit nga dapit sa Pikit.
Gisapupo ang mga biktima sa mga opisyal sa barangay ug gidala sa Cruzado Medical Hospital apan gideklara sa naghiling nga doktor si Reformado nga nakabsan sa kinabuhi.
Samtang grabe sab ang kahimtang ni Lapined hinungdan nga gibalhin kini sa dakong balay tambalanan sa siyudad sa Kidapawan.
Giingong ilhan na ang mga suspek sa kapulisan sa Pikit Municipal Police Station ug padayon karon nga gipangita aron nga madakpan ug manubag sa salod nga gibuhat.