Human sa upat ka buwan nga sinikhanay, binanggaay, trash talk ug dinaganay pagdakop sa bola, masayran na karong gabii, Enero 15, 2023 kinsa ang mahimong kampiyon tali sa Barangay Ginebra Kings ug Bay Area Dragons atol sa game 7 sa PBA Commissioner’s Cup sa Philippine Arena sa Bocaue, Bulacan.
Pulos mapatik sa kasaysayan bisan si kinsa ang modaog sa gikahinamang panagsangka tali sa Philippine hottest team ug guest team Bay Area Dragons.
Ang Dragons, kon modaug, maoy labing unang guest team nga makalangkat sa korona sa PBA human ni Nicholas Stoodley sa United States niadtong 1980.
Alang sa Ginebra, kini maoy tsansa aron ilang ilansang ang ika-15 nga kampyonato nga maoy magbutang kanila isip second winningest team ug mabiyaan na nila ang Magnolia ug Alaska Milk nga adunay 14 ka championships.
Kini gituohan nga maoy magpuno sa Philippine Arena nga adunay kapin o kulang 55,000 capacity nga naghuwat sa showdown tali nila ni naturalized Filipino Justin Brownlee ug Myles Powell, kinsa pulos high scoring import.
Ang mga nakapalit og ticket apan walay sakyanan, ang PBA adunay libre nga shuttle bus aron maoy modala ug mopasakay og balik kanila ngadto sa venue ug pabalik.
Si Brownlee gusto nga madepensahan ang iyang korona ug nagtinguha nga molangkat sa ikaunom niyang kampyonato. Siya wala pa makasuway og pilde sa Finals series ug iyang pangulohan ang Ginebra sa pagpasawop sa Bay Area.
Si Powell usab adunay iyang kaugalingon nga misyon ug kini mao ang pagkumpleto sa iyang tahas nga 11-11 sanglit 10-10 na ang iyang record, diin sa 10 ka duwa, 10 usab ang iyang daog.
Ang duha ka manag-atbang nga import, apan gumikan sa balaod, si Brownlee nahimo nang usa ka Pinoy, maoy makahatag og kalingaw sa mga manan-away.
Sa unang unom ka duwa, ang Ginebra maoy nidaog sa Games 1, 3 ug 5 samtang ang Dragons maoy nilabni sa 2,4 ug 6.
Ang Kings aduna untay tsansa pagtak-op sa telon niadtong Miyerkules apan si Powell sa Dragons maoy ni-rescue ug sila nakaeskapo pinaagi sa 87-84.
Ang Kings nakaagi na sa samang pagsuway ug aduna silay mga beterano sama nilang LA Tenorio, Scottie Thompson, Christian Standhardinger, Stanley Pringle ug Japeth Aguilar.
Apan wala pa sila nakakontra og sama sa Dragons sa miaging mga tuig nga sama kanila determinado usab mahimong kampyon.
Ang record sa Philippine Arena nga nakulit sa PBA lima na katuig ang nakalabay niabot og 54,084 nga gituohang mabuak. (PAC)