Ang Cebu City Government mopahigayon og ground breaking ceremony alang sa P50 million development sa Doña Pepang cemetery nga himuong heritage park karong Hunyo 12, 2023.
Kini ang tentative schedule nga gipahibawo ni Ramil Ayuman, special assistant sa Office of the Mayor alang sa special projects aron mapanindot ang 11,742 square meter nga menteryo.
Si Ayuman nagkanayon nga adunay pito ka mga business establishment nga nahimutang palibot sa Doña Pepang nga nipadayag sa ilang kaandam pagtabang sa City Government alang sa public-private partnership nga programa.
Gipahibawo usab sa kanhi barangay kapitan sa Apas nga karon sinaligan na ni Mayor Michael Rama nga mopahigayon sila og follow-up meeting karong adlawa, Mayo 30, alang sa dugang pagsabotsabot.
“Well ang atong gi-project karon is by June 12 but magdepende na sa meeting nato tomorrow (today) with private sectors nga motabang, we are planning nga mag-ground breaking nata diha sulod sa Doña Pepang,” matod ni Ayuman.
Ang Osmeña mausoleum magpabilin, diin butangan kini og public plaza ug amphitheatre aron makasuroy ang mga tawo ug maka-host usab og mga kalihukan.
Gipadayag ni Ayuman nga adunay unom ka buwan ang contractor sa paghuman unya sa heritage park sa dakbayan sa Sugbo sa higayon nga masugdan.
Ang Prevention, Restoration, Order, Beautification and Enhancement (Probe) team, Cebu City Traffic Office (CCTO) ug Department of Engineering and Public Works (DEPW) nipahigayon na og demolition sa mga illegal structure sa miaging mga buwan aron paghatag og agianan sa kalambuan sa Doña Pepang.
Ang mga illegal settler nga kanhi nagpuyo sulod sa sementeryo gipapauli na sa ilang tagsa-tagsa ka mga lokalidad nga sakop ra usab sa probinsya sa Sugbo.