Sa hugot nga monitoring sa Philippine Drug Enforcement Agency (PDEA 7) sa drug personalities nga naa sa ilang listahan taliwa sa nagsingabot nga Barangay ug Sangguniang Kabataaan elections (BSKE) sa Oktubre 2023, ilang nasuta nga way nagtinguhang magpapili.
Matod ni Leia Alcantara, information officer sa PDEA 7, nga sa pagkakaron wala pa silay nasayran nga dunay nalambigit sa ilegal nga drugas nga nagtinguha nga mo kandidato, apan sa gihapon, sila nakig-alayon sa ilang counterpart nga mga ahensya sa gobiyerno aron mabantayan ang maong mga personalidad ug makabantay usab ang publiko.
Dili layo ang posibilidad nga mokandidato sila o kaha mohatag og suporta sa pinansyal nga aspeto.
Tungod niini, niawhag ang PDEA 7 ngadto sa mga mokandidato sa nagsingabot nga BSKE ug SK nga piniliay nga sila mismo ang magbantay sa pagdawat og suporta nga mohatag og campaign funds gikan sa ilang mga tawo sa ilang barangay kon wala ba kini malambigit sa ilegal nga drugas.
“Basin wala mo kahibawo nga ang source diay anang kwarta nga gihatag sa inyo to support your candidacy is drug money na diay. Anha nana eventually kon makadaog mo, mahigot na mo kay naa na moy utang kabubot-on, diha nana mo involve nga actually nga mahimo na mong protector,” matod ni Alcantara.
Giangkon niya nga nagpadayon ang validation sa mga incumbent elected officials kon unsa ka lawom ang ilang kalambigitan sa ilegal nga drugas.
Lakip sa ilang validation ang financial investigation uban sa Anti-Money Laundering Council.