Gipasidunggan sa Cebu City Police Office (CCPO) ang usa ka drayber sa motorcycle hailing app nga nakadakop og gikatahapang esnatser sa dalan Colon, dakbayan sa Sugbo niadtong Mayo 24, 2023.
Ang suspek iyang naatlan nga nanglabni og butang sa usa ka babaye.
Si ‘Marlon,’ kanhi tanod sa Brgy. Luz, siyudad sa Sugbo, gipasidunggan tungod sa iyang kaagresibo sa pagtabang sa biktima nga mauli ang pitaka niini nga dunay sulod nga kwarta, cellular phone ug mahinungdanon nga mga dokumento.
Tinuod niyang ngan gipugngan alang sa seguridad.
Matod ni Police Colonel Ireneo Dalogdog, hepe sa CCPO, nga talagsaon ang gipakita ni Marlon kay wala mahadlok sa usa ka kriminal nga naghimo og krimen sa iyang atubangan.
“Talagsaon ra kaayo ni siya kay naa siyay kaisog ba, mao na nga gitagaan nato siya og recognition. Naa sad ta gihatag nga cash,” matod ni Dalogdog.
Gibutyag ni Marlon nga samtang nagpaabot siya og kustomer nga mo book sa ilang app niadtong tungora, kalit lang nga dunay nisinggit nga dunay gilabnihan.
Dali niya nga gigukod ang suspek ug naabtan sa may Tabo sa Banay sa Osmeña Boulevard ug iyang gigamit ang iyang nakamaohan sa training sa Philippine National Police (PNP) sa dihang siya barangay tanod pa.
“Maoy akong nasugatan nga ang Citom nisyagit nga niingon nga snatcher gukora ninyo. Walay pagduha-duha diretso sad kog gukod pero sa akong hunahuna presence of mind lang ko nga ma safety ra sad ko,” matod ni Marlon.
Gidayeg sa kapulisan ang pagpakabana ni Marlon sa iyang isig ka tawo bisan kon nabutang sa peligro ang iyang kinabuhi.
Giangkon ni Dalogdog nga dako kaayo ang matabang sa komunidad sa pagsumpo sa usa ka krimen kon magpakabana lang sa iyang palibot.