Upat ka mga batan-on nangapriso sa Abellana Police Station sa Cebu City Police Office (CCPO) alas 3:00 sa kaadlawon sa Lunes, Mayo 29, 2023, tungod sa rambol sa General Maxilom Ave., Brgy. Kamputhaw, Cebu city.
Sila si P/Cpl. John Cylde L. Pelandas, Patrolmen Jojiet D. Mendez ug Epril John P. Dador nga nakaistambay niadtong tungora maoy nakatubag sa alarma sa nagrambol nga mga batan-on sa usa ka imnanan.
Ang mga napusasan mao sila si Junry Algarme Minor, 20; Kintwhell Payusan Cartilla, 20; ug Aldren Cala Sabal, 22, pulos taga Sityo Jorge, Brgy. Guadalupe, Cebu city.
Samtang ang katapusan nga nadakpan mao si Brando Villacorta, 20, taga Dos Dos Village, Brgy. Tisa ning siyudad.
Matod ni Police Col. Ireneo Dalogdog, pangulo sa CCPO, nangadakpan ang upat tungod sa ilang pagkalambigit sa rambol.
Ang sinugdanan sa kagubot tungod lang sa usa ka grupo nga gihatagan og beer apan wala mauyoni sa grupo sa laing lamesa.
Ang matag grupo niini nagkasinabot ug nagkauliay na sa maayong kabubut-on, apan ang kapulisan mopadayon sa pagpasaka gihapon og kaso.
Usa sa sutaon karon sa CCPO mao nga si kinsa ang nagsugod sa kagubot ug kinsa usab ang nihatag sa beer nga maoy sinugdanan sa kagubot.
Kasong alarm scandal ang atubangon sa upat nga sa pagsuwat ning taho, naa pa sa bilanggoan.