Ipahigayon ang demolisyon sa mga pedestrian skywalk aron mahatagan og dugang luna ang nagpadayong proyekto sa Cebu Bus Rapid Transit (CBRT) system.
Si Konsehal Jerry Guardo, committee on infrastructure chairperson, niingon sa interbyu nga alang sa Phase 1, duha ka pedestrian skywalks ang ipaubos sa demolisyon, usa duol sa Fuente Osmeña Circle ug usa duol sa Cebu Normal University (CNU).
Matod ni Guardo nga kinahanglang tangtangon ang maong mga pedestrian skywalk aron dili makabalda sa dagan sa CBRT ug maghatag og dan sa maanindot ug napalambo nga mga sidewalk.
Nangatarungan siya nga kon tangtangon na lang nila ang mga supporting column nga nagbabag sa BRT, mahuyang ang tibuok imprastraktura, mas maayo nga dili na lang kini ipabilin.
Dugang niya nga kabahin usab sa konsiderasyon mao ang pagbawi sa duha ka lanes alang sa south ug north bound, lakip na ang bike lanes.
Isip puli sa pedestrian skywalks, ang mga crosswalk ipahimutang uban sa digital traffic lights, matod ni Guardo.
Dugang niya nga tungod sa kasamtangan nga center islands kaniadto, kining mga pedestrian skywalk nabutang.
Si Jose Mari “Jay” Alba, acting chairman sa Cebu City Transportation Office (CCTO), nidugang usab sa buwag nga pakighinabi nga ang mga pedestrian skywalk nga maapektuhan sa CBRT project kinahanglang gub-on aron matuman usab ang minimum headroom requirement sa BRT buses. (AML)