Ex-convict ug iyang silingan nga nag-angkasay sa motorsiklo nangamatay sa ambush sa alas 3:00 sa hapon sa Dominggo, Mayo 28, 2023 sa Brgy. Apo, lungsod sa Argao, habagatang Sugbo.
Ang mga biktima giilang sila si Renel Albarracin, 28, alyas Nelbor, taga Brgy. Colawin, lungsod sa Argao ug si Steven Bajenting, 21, ulitawo. Si Albarracin ex-convict.
Si Police Major Andy Michael Roque, hepe sa Argao Police Station nga nahinabi sa Superbalita Cebu, nagkanayon nga si Kapitan Vladimir Solis maoy nipahibalo kanila sa hitabo.
Sa pag-abot nila sa lugar, ilang naabtan nga wala nay kinabuhi ang mga biktima.
Matod ni Roque nga sa wala pa nahitabo ang kremin, ang mga biktima ning-estambay una pipila ka minutos sa barangay hall sa Apo.
Ang kabanay ni Bajenting nibutyag nga padulong ang mga biktima sa lungsod sa Sibonga, apan wala masuta kon unsay ilang tuyo.
Si Roque nibutyag nga 700 metros ang gilay-on sa crime scene gikan sa barangay hall sa Apo.
Sila nagtuo nga giatangan sa di mominos duha ka mga tawo ang mga biktima nga nag-angkasay sa motorsiklo.
Ang mga killer nagtago sa kalibunan daplin sa dalan.
“Drugas usa sa atong gitan-aw nga motibo sa kremin. Kini si Albarracin usa ka ex-convict sa kasong illegal drugs,” butyag ni Roque.
Wala nila isalikway ang posibilidad nga dunay gikabangi si Albarracin sa ilegal nga kalihukan.
Samtang gisusi sab nila ang kabahin kang Bajenting, kinsa tindero og itlog kaniadto.
Ang kapulisan nakakuha og mga kabhang sa bala sa crime scene.
Nangita ang kapulisan og mga saksi sa krimen nga makatabang sa ilang imbestigasyon. (GPL)