MAPASALAMATON ang lokal nga panggamhanan sa Dakbayan sa Tagum ubos sa pamunoan ni Mayor Rey T. Uy sa grupo sa mga katawhan nga nagkahiusa sa pagtukod og simple apan desenteng panimalay didto sa Purok 6B, Barangay Apokon, Mayo 29, 2023.
Matud pa nga ang maong mga grupo nga nagsilbing dugang kamot sa gipahigayong bayanihan nga gilangkuban sa grupo sa Tagum Cooperative, Task Force Kasanag, Inc., Federation of Motorcycle Mindanao, Traffic Management Unit ug Security Management Unit.
Anaa sab ang Council of Women sa siyudad sa Tagum nga mihatag og mga B’yaneng bricks nga magpalig-on og samot sa gitukod nga panimalay.
Gibutyag nga ang maong mga grupo boluntaryong migahin sa ilang oras ug panahon alang sa programa sa Bayanihan Lingap Pinuy-anan sa LGU Relocation site nga nahimutang sa nahisgutang dapit.
Dugang gibutyag nga prayoridad sa maong programa nga pabahay ang mismong mga residente sa dapit nga na-displaced ug kadtong mga kabus nga anaa sa accretion area sa Barangay Apokon.
Giawhag sa City Government of Tagum ang lain pang mga grupo nga gustong mogahin sa ilang oras ug panahon kinsa andam moboluntaryo ug makigsabot sa opisina sa City Housing and Land Management nga nahimutang sa Annex Building sa City Hall.