KASO nga double murder, multiple frustrated murder ug arson ang atubangon sa usa ka bomb expert sa mga terorista nga nadakpan sulod sa balay tambalanan alas 7:45 sa gabii niadtong Mayo 28 sa Cotabato City.
Giila ang suspek nga si Kuntong Basilan, alyas Tong Basilan ug alyas Michael Basilan.
Gibutyag ni 6th Infantry (Kampilan) Division Chief ug Joint Task Force Central Commander Major General Alex Rillera nga nakadawat sila og taho nga si Basilan dunay giduaw nga pasyente sulod sa Cotabato Regional and Medical Center (CRMC) sa Cotabato City.
Abtik nga nagpahigayon og law enforcement operation ang hiniusang puwersa sa 90th Infantry Batallion (IB), 34IB, Philippine National Police-Special Action Force, ug Criminal Investigation and Detection Group-Maguindanao Provincial Field Unit.
Wala na makalihok ang suspek sa diha nga napalibutan na siya sa mga sundalo ug pulis nga midakop kaniya.
Dugang ni Rillera nga si Basilan nag-atubang sa nagkadaiyang kaso.
“Base sa ating impormayon, nasangkot ang suspek sa gun-for-hire, harassment at landmine attack sa military installation sa Sitio Risingan, Dungguan, Aleosan, Cotabato; pagsunog sa mga ari-arian ng sibilyan sa Sitio Poypoyon, Dungguan, at Bagolibas, Aleosan at Baliki, Midsayap, Cotabato noong 2008, at serye ng mga shooting incidents target ang PNP at AFP (Armed Forces of the Philippines) sa Sultan Kudarat, Maguindanao del Norte noong 2019 hanggang 2020,” sigun sa opisyal.
Gitumbok sab ni Rillera nga ang suspek usa ka bomb expert sa Bangsamoro Islamic Freedom Fighters (BIFF-Karialan faction).
Sa kasamtangan gibalhog na ang suspek sa custodial facility sa CIDG-Barmm ug padayon nga giimbestigahan.