BISAN pa sa bag-o nga mga krimen nga nahitabo sa Siyudad sa Davao, usa ka opisyal sa Davao City Police Office (DCPO) nipasalig nga “luwas gihapon ang Davao City”.
Kini ang gibutyag ni DCPO Spokesperson Police Major Catherine Dela Rey pinaagi sa Facebook message niini sa SunStar Davao, May 29.
Sumala ni Dela Rey nga luwas gihapon kaayo ang Davao City, ug padayong anaa ang daghang mga pulis naglibot-libot sa siyudad diha sa pagpatuman sa anti-criminality campaign.
“Davao City is still safe po... We could say that effective and efficient po ang conduct of intensified crime prevention activities like police visibility through patrols and implementation of anti-criminality campaign,” ingon ni Major Dela Rey.
Miingon sab kini nga miubos ang crime incidents ning tuiga, itandi sa miaging tuig 2022.
“In fact, bumaba po ang (we recorded lower) crime incidents this year compared to last year," niya pa.
Si Dela Rey niingon nga ang pinakaulahing datus sa DCPO nakatala og 94 ka mga focus crimes sa dakbayan gikan sa Enero hangtod Abril ning tuiga, itandi sa 167 ka kaso sa samang panahon sa miaging tuig.
Ang focus crime naglakip sa murder, homicide, physical injury, rape, theft, robbery, car theft ug motorcycle theft.
Ang tigpamaba sa DCPO niingon usab nga misubay sila sa mando sa Police Regional Office - Davao Region (PRO-Davao) sa pagpakusog sa pagpatrolya sa kadalanan pinaagi sa bag-o lang gilusad nga Patrol Rehiyon Onse program.
Siya miingon nga ang pagpatrolya mao ang "backbone" sa trabaho sa pulisya - pagpugong sa daghang mga krimen kaysa pagsulbad niini.
“Sa Patrol Rehiyon Onse, gipabalik sa atong regional director [PBGen Alden Delvo] ang pinaka-basic gyud nga trabaho sa kapulisan, mao ni ang crime prevention o ang pag-patrol diha sa mga kadalanan,” ingon ni Dela Rey sa interbyu sa Davao City Disaster Radio.
Matud usab ni Dela Rey nga nakab-ot nila ang zero crime incidence atol sa pag-host sa dakbayan sa dagko ug gagmay nga mga kalihukan sama sa Meetings, Incentive Travel, Conventions, Exhibitions Conference (Micecon), Ironman 70.3 marathon, Araw ng Dabaw, ug uban pa.
“Ginapaningkamotan sa Davao City Police Office led by City Director Col. Alberto Lupaz nga mas mobaba pa gyud, masirado nato ang tuig sa pinakababa nga record sa crime incidence sa Dakbayan sa Davao,” butyag ni Dela Rey.
Talagsaon sab ang ingon ni kanhi Davao City Mayor ug kanhi presidente Rodrigo Duterte kinsa mikomento nga "ang kadalanan dili pa luwas" ug ang makahahadlok nga mga krimen nakadugang kini sa kahadlok ngari sa nasud.
"There are a lot of heinous crimes committed sa (on) helpless citizens. These streets are really not that safe anymore,” ingon ni Duterte sa speech niini, Mayo 25 sa Davao City.
Kapin sa usa ka semana ang nakalabay, ang architect nga si Vlanche Marie Bragas gipatay didto sa Calinan sa wala pa mailhing mga suspetsado ug gipaubos sa imbestigasyon sa Special Investigation Task Group (SITG) Bragas ang maong kremin.
Laing insidente sa pagpamusil usab ang gikataho sa R. Castillo, Davao City nga naglambigit sa usa ka kanhi army isip usa sa mga persons of interest (POI) sa usa ka kremin.
Niadtong Abril ning tuiga sab, usa ka personahe sa Philippine Coast Guard-Davao (PCG-Davao) ang giingong nanglugos sa pipila ka freelance models nga mireklamo sa National Bureau of Investigation (NBI) Davao.
Gikataho nga gi-tag sa DCPO kining mga insidenteha nga "isolated cases" lamang.
Hinuon, giawhag ni Major Dela Rey ang publiko nga i-report sa DCPO ang bisan unsang kadudahan o hulga sa seguridad ug kaluwasan sa Davao City.