DAVAO DEL NORTE -- Nakuhaan og illegal nga druga ang usa sa mga nadakpan sa gilusad nga anti-illegal gambling operation sa Purok 4, Barangay New Loon, Asuncion alas 11:00 sa buntag, Lunes, Mayo 29, 2023.
Ang suspek giila sa pangalang George Lucas Agmata, 48, minyo ug molupyo sa Purok 5, Barangay New Santiago, Asuncion.
Gibutyag nga nakumpiska gikan kang Agmata ang druga nga dunay gibug-aton nga di moubos sa usa ka gramo ug gibana-banang nagkantidad og P6,800.
Matud pa nga nalakip ang suspek sa lima ka mga nadakpan sa gilusad nga anti-illegal gambling operation sa mga kapulisan sa Asuncion Municipal Police Station ug uban pang yunit sa mga awtoridad.
Sumala pa nga ang suspek nga si Agmata naaktuhan nga nalambigit sa ilegal nga tigbakay sa manok, uban sa laing upat ka nadakpan nga sila Jeetlee Espina, 26, nga taga Purok 1C, Barangay Pamacaun, Asuncion; Ponciano Barba, 71, minyo nga molupyo sa Purok 2, Barangay New Loon, Asuncion; Jison Potugaliza, 36, minyo nga taga Purok 2, Barangay New Loon, Asuncion; ug Ramil Cabulao, 40, minyo nga taga Block 4, Lot 29, Villa Clementa, Maniki, Kapalong.
Gawas sa mga druga nga nakumpiska gikan kang Agmata, nakompiska sab sa mga pulis ang duha ka buhing manok panabong, duha ka blade sa sabong ug bet money nga balor og P1,150 sa nagkadaiyang denominasyon.
Ang mga dinakpan, lakip na ang mga nasakmit nga ebidensiya, gikustodiya na sa Asuncion MPS alang sa tukmang disposasyon.