MALIPAYONG gidawat sa Municipal Administrator ug Gender and Development Focal Person Ben Guzman ang pasidungog nga gihatag sa Department of the Interior and Local Government (DILG) sa Davao Region nga may kalabutan sa gender and development.
Si DILG Davao Regional Director Josephine Leysa, CESO III maoy nitunol sa pasidungog.
Matud ni Dir. Leysa, tumong niini nga mahimong GAD Zone ang tibuok rehiyon ug sa ikaduhang tuig sa GAD Seal Awarding gibuksan niini ang pultahan alang sa mga lokal nga kagamhanan ug duha lang sa probinsiya sa Cotabato ang gipasidunggan.
Dako ang pasalamat ni Kabacan Mayor Evangeline Pascua-Guzman. Matud pa niya, ang maong pag-ila maoy usa ka testimoniya nga ang lungsod sa Kabacan nagsunod sa tumong sa DILG nga himuong GAD Zone ang rehiyon.
Dugang pa sa mayor nga sa tibuok probinsiya, ang Kabacan lang ang adunay GAD-Sex Disaggregated Data nga maoy basehan sa mga programa sa gobyerno sa mga proyekto ug programa niini.
Samtang, ang GAD usa ka kategorya alang sa prestihiyusong Seal of Good Local Governance nga gihatag sa mga lungsod ug probinsiya.
Ang GAD Seal award adunay balido nga tulo ka tuig ug mahuman kini sa Hunyo 2026 nga matud pa ni Mayor Gelyn usa ka dakong lakang aron matuman ang pangandoy sa lungsod nga mahimong usa sa mga GAD Champions sa tibuok probinsiya ug nasud.