MAGDUHA ka semana na sa Mayo 31, 2023, human nga napalgang wala nay kinabuhi ang batan-ong architect nga si Vlanche Marie Laruan Bragas sa sagingan sa Dacudao Calinan Davao City niadtong Mayo 17 apan pabilin pa gihapon misteryo ang kamatayon niini.
Wala pa'y konkreto ug matuod nga suspek ang kapulisan sa Davao City Police Office nga matudlo nga responsable sa kamatayon sa dalaga nga una nang giingon subay sa resulta sa medico legal nga gilugos ang biktima dayon gipatay.
Una nang giingon sa Police Regional Office (PRO) Davao nga duna nay lima ka mga ginatan-aw nga mga persons of interests (POIs) labot sa krimen, apan dunay migula nga impormasyon gikan sa kasaligan nga impormante nga giingong nag-negatibo sa saliva testing ang mga nahisgutan.
NBI-Semro mihimo'g imbestigasyon
Sa padayong imbestigasyon sa kaso luyo sa gitukod sa Davao City Police nga Special Investigation Task Group (SITG) Bragas, mihimo sab og kaugalingon nga imbetigasyon ang National Bureau of Investigation-Southeastern Mindanao Regional Office (NBI-Semro) sa Davao City.
Sumala ni Atty. Arcelito Albao, Regional Director sa NBI-Semro nga naglusad sila og usa ka lihetimo nga operasyon labot sa usa ka lalaki nga nagpositibo sa ilang drug test-buy ug miresulta ang malampusong pagkasikop sa usa ka alyas Empoy nga taga Calinan sa maong siyudad.
Si alyas Empoy nakuhaan og mga ebidensiya nga gidiling druga ug pusil sa operasyon ug giingon ni Atty. Albao nga siya usa sa mga ginatan-aw nga person of interest sa kamatayon ni Bragas. Kini subay sa mga testigo nga nakalap sa NBI-Davao.
Ang suspek nga si Empoy naa sa kustodiya sa NBI-Davao, apan ang asawa niini nangulipas sa pasangil ug nagkanayon nga "planted" kuno sa NBI-Davao ang mga ebidensiya nga nakuha gikan sa posisyon sa iyang bana, ug yanong tour guide lang kini sa mga mosaka sa Mt. Apo ug inosente ug walay kalabutan sa kamatayon ni Bragas.
Nanga-missing sa Calinan
Una niini, sa laing bahin, missing sab ang usa ka 23-anyos nga ulitawo nga taga Calinan, Davao City, apan niadtong Lunes, Mayo 29, mipatim-aw kini sa mga pulis sa Talomo Police Station gikan sa pagluwas sa mga rescuers kaniya.
"Sa interview sa pulis ngadto kaniya, iyang giingon nga gidagit siya sa mga lalaki sa Calinan, gitalian ang mga kamot, gitaptapan og packaging tape ug gikulata human siyang gipasanginlan nga usa sa mga suspek sa paglugos ug pagpatay kang Architect Vlanche Marie Bragas, nakaikyas siya sakay sa usa ka sakyanan," sumala ni Police Major Noel Villahermosa, hepe sa presinto tres.
Ikaduhang missing sa Calinan District human sa kamatayon ni Bragas mao ang usa ka 19-anyos nga lalaki nga giingong gidagit ug pugsanon nga gisakay sa usa ka SUV, color gray, didto sa Purok 1, Barangay Lacson, Calinan, mga alas 3 sa hapon niadtong Sabado, Mayo 27. Subay kini sa Facebook post sa usa ka Analou Espinosa Chaves.
Perteng guola sa inahan sa 19-anyos, sanglit birthday sa iyang anak pagka-Dominggo, Mayo 28, hinungdan nga nagsige kini og balik-balik sa Calinan Police Station aron mangayo og unsay update sa pagkawala sa iyang anak.
Kagahapon sa buntag, Mayo 30, naay nakita nga patay'ng lawas sa tawo nga nasangit sa batohan sa sapa sa Purok 7, Los Amigos, Tugbok District, Davao City, apan wala pa kini nailhan sa awtoridad.
Bahin sa DCPO
Sumala ni DCPO director Police Colonel Alberto Lupaz nga padayon pang gina-imbestigahan sa awtoridad kung "connected" ba sa Bragas rape-slay ang mga nanga-missing sa Calinan.
"Ato pa ning giimbestigahan kay usahay naay mga guilty nga mga tawo mo-declare dayon og mga ingon ana... basin gulity gyod sila? Sa Pagkakaron nagpadayon pa kita sa pag-imbestiga sa maong hitabo," tipik sa pamahayag ni Col. Lupaz nga nahinabi sa dxDC RMN Davao.
Gibarugan sab sa DCPO ang Facebook post labot sa color yellow nga Umbak nga dili sila ang responsable sa pag-post niini, dungan sa paggamit sa hotline number sa DCPO.
Hinuon padayon nga ginasubay sa kapulisan sa Calinan ang mga yunit sa Umbak nga nagdagan sa Poblacion area ug sa mga kasikbit.
Una nang giingon nga dunay "bungo sa tawo" nga dunay sungay ang usa ka sticker nga gipilit sa Umbak nga gisakyan ni Bragas subay sa kuha sa closed-circuit television (CCTV) camera.
PRO-Davao mipasalig
Samtang, dako ang pagsalig sa kapulisan nga masulbad kini nga kaso, ug dili usab angay nga mabalaka ang katawhan luyo sa gapadayon nilang hugot nga seguridad sa dakbayan ug sa tibuok rehiyon.
Subay niana, gipahingusgan sa Davao City Police ang launching sa Patrol Rehiyon Onse nga gipangunahan ni PRO-Davao director, General Alden Delvo nga nagtumong nga mas palambuon pa ang ilang pagpatrolya aron mapahugtan pa ang kahapsay ug kalinaw sa dakbayan.
Hiniusa karon ang puwersa sa PRO-Davao, Davao City Police Office (DCPO), Special Investigation Task Group (SITG) ug Calinan Police Station diha sa ilang padayon nga imbestigasyon sa krimen ug dili sila moundang hangtud dili makuha ang hustisya sa kamatayon sa biktimang si Bragas.