Kapin sa 11,200 ka mga pamilya ang naapektuhan sa Bagyong Betty (Mawar) sa upat ka mga rehiyon sa nasod, matod sa National Disaster Risk Reduction and Management Council (NDRRMC) sa Martes, Mayo 30, 2023.

Sa usa ka situational report, ang NDRRMC nagkanayon nga moabot sa 2,859 ka mga pamilya o 11,264 ka mga indibidwal ang naapektuhan sa bagyo partikular na sa 55 ka mga barangay sa Cagayan Valley, Cordillera Administrative Region (CAR), Western Visayas ug Central Luzon.

Matod pa nga 877 ka mga pamilya o 3,483 ka mga tawo ang anaa sa sulod sa evacuation centers, samtang 112 ka mga pamilya o 381 ka mga indibidwal ang temporaryong nagpuyo sa mga higala o paryente.

Ang disaster bureau niingon nga tulo ka mga seksyon sa karsada sa CAR ang dili maagian, apan ang mga debris nalimpyo na kaniadtong Martes.

Natala usab ang pagbaha sa Western Visayas.

Sa CAR, tulo ka power interruptions ang nahitabo, apan duha ang nahibalik na.

Ang NDRRMC nagkanayon nga 104 ka mga domestic ug 17 ka international flights paingon ug gikan sa apektadong mga lugar ang gikanselar tungod sa dili maayo nga panahon.

Matod pa nga 222 ka mga pasahero ug 122 ka rolling cargoes usab ang na-stranded sa mga pantalan sa kadagatan sa Eastern Visayas.

Duha ka mga balay sa Central Luzon ang gikataho nga naguba tungod sa epekto ni Betty.

Ang NDRRMC nagkanayon nga adunay kinatibuk-ang P1,897,764 nga kantidad sa mga food and non-food relief items ang naapod-apod na ngadto sa apektadong populasyon. (TPM sa SunStar Philippines)