Babayeng tinun-an sa Grade 10 sa usa ka tunghaan sa dakbayan sa Naga giingong gitabangan sa paglugos kun gang rape sa iyang mga classmate ug schoolmate nga mga lalaki atol sa pagtambong niini og debut sa iyang higala niadtong Mayo 25, 2023.
Matod sa ginikanan sa biktima nga nahinabi sa DyHP RMN Cebu ug Superbalita Cebu, nananghid kaniya ang iyang anak babaye nga motambong sa party sa ilang classmate nga nagsaulog sa ika 18 nga birthday.
Apan natingala sila nga kaadlawon na lang sa Mayo 26, wala pa mauli ang ilang anak.
Gipangita kini sa iyang mga higala ug classmate ug pagka alas 2 sa kaadlawon napalgan ang biktima sa ibabaw sa dakong tangke sa tubig sa Barangay Jaguimit, dakbayan sa Naga, nga wala nay panimuot.
Sa ilang pagsukitsukit sa biktima, kini naghilak nga niangkon nga niapil siya og tagay sa mga nanambong sa birthday ug dunay gipainom kaniya nga wala siya masayod hangtod nga nahubog na siya og maayo.
Ang iyang mahinumdoman nga gidala siya sa ngitngit nga lugar ug didto gipuli-pulihan sa paglugos.
Uban kanila ningpaduwa pa kaniya sa ilang kinatawo.
‘GIPAINOM’
“Ako man na giestorya akong anak. Duna daw gipainom niya nga tabletas mao na to murag nalipong na siya pag-ayo. Gidala daw siya sa ibabaw sa tangke ug didto gihilabtan,” asoy sa inahan sa biktima.
Usa sa iyang mga classmate nga babaye niapas sa biktima apan gibabagan siya sa mga suspek ug gitukmod nga niresulta sa iyang pagkaligid sa bakilid.
Siya usab ang nisaysay sa mga ginikanan sa biktima sa gihimo sa mga suspek.
Dunay mga ngalan nga gitug-an ang mga ginikanan nga maoy naghimo sa krimen, duha ani giingong anak og konsehal sa barangay, usa ang anak og barangay health worker (BHW) ug ang usa pag-umangkon sa laing opisyal.
Sa samang adlaw ilang gi-report dayon sa Naga City Police Station ug gipaubos sa medical examination ang biktima sa Pink room sa Vicente Sotto Memorial Medical Center.
Sa inisyal nga resulta, nakaangkon og “hematoma at 6 o’clock position extending to the perihymenal area. Deep notch at 9 o’clock position” nga nagpasabot nga nahilabtan ang dalaga.
Apan natingala ang mga ginikanan nga hangtod sa pagsuwat ning balita wala pa mapasaka ang kaso sa korte.
“Ang akong gikatingad-an, Sir, nganong wala pa man ni ma-file ang kaso nga naa man mi ebidensya ug witness. Huwaton pa daw ang final medical result karon pang June 16, 2023,” matod sa inahan.
NAG-IMBESTIGAR
Si Police Lieutenant Colonel William Homoc, hepe sa Naga City police station, niingon nga nagpadayon pa ang ilang imbestigasyon.
Gani didto na sa barangay ang iyang personnel sa Women and Children Protection Desk aron manguha na og kasayuran.
Duna na silay usa ka saksi nga diha sa hitabo nga makapamatuod sa pag gang rape sa biktima.
“Ongoing ang atong imbestigasyon ani, Sir. Naa na tay usa nga maka testify sa incident ug pwede na ta maka file og kaso aning mga suspect,” matod ni Homoc sa Superbalita Cebu sa Martes, Mayo 30, 2023.
Gihimakak ni Homoc nga ilang gilangay ang pagpasaka og kaso batok sa mga suspek kay naghimo pa man sila sa ilang imbestigasyon aron lig-on ang kaso nga ilang isang-at sa korte.