Gipahibawo sa naturalized Filipino big man nga si Ange Kouame nga dili niya talikdan ang Pilipinas sa higayon nga kinahanglanon ang iyang serbisyo alang sa Gilas Pilipinas.
Ang iyang pamahayag nitumaw human wala pay kasigurohan niining puntoha kon kinsa ang malakip sa komposisyon sa Gilas Pilipinas alang sa 2023 World Cup karong Agusto.
Ang kanhi Ateneo de Manila University standout nagkanayon nga mohaom siya sa national team kon imbitahon siya sa Samahang Basketbol ng Pilipinas (SBP) sa umaabot.
“Yeah for sure, 100 percent,” matod ni Kouame sa dihang gipili siya isip 2022-2023 Basketball Player of the Year sa Collegiate Press Corps niadtong Lunes, taho sa spin.ph.
“At the end of the day, I’m still a Filipino so if the call is there, I’ll still represent the country,” dugang ni Kouame.
Si Kouame nakasalmot sa national team sa makatulo ka mga higayon sa World Cup Asian Qualifiers, nga nag-average og 4.3 puntos ug 5.3 ka rebounds samtang iyang nagiyahan usab ang nasod atol sa 2021 FIBA Asian Cup Qualifiers.
Hinuon, na-sideline siya sa tournament proper tungod sa meniscal sprain ug partial ACL tear.
Ang pagkaangol nakapugong usab kaniya sa pagduwa sa bag-o lang natapos nga Southeast Asian Games sa Cambodia, diin kabahin siya sa 3x3 pool kauban si Almond Vosotros.
Si Kouame niingon usab nga nakasabot siya sa mga desisyon ni Gilas head coach Chot Reyes nga ipabutang ang ubang naturalized nga mga magduduwa nga sila si Jordan Clarkson ug Justin Brownlee sa miaging mga outing sa national team. (PAC)