Super Suroy: Ang nabantog Blue Hole sa Tuburan

Super Suroy: Ang nabantog Blue Hole sa Tuburan

Adunay tinagoang hiyas ang Lungsod sa Tuburan, nahimutang sa tungatungang-kasadpan sa Lalawigan sa Sugbo, usa sa nahimong atraksiyon sa mga lokal nga turista, nga mao ang tubod o spring.

Apan mas nakadani ang tubod nga ang tubig nga napundo nag-amag ang kolor blue o asol hinungdan nga ginganlan sa mga lokal og ‘Blue Hole.’

Nasayran nga ang karaang ngalan sa maong tubod, gitawag kaniadto og ‘Sinungkulan’, nga nagpasabot nga katapusan o dead end.

Sa nanglabay nga katuigan ug sa nagka-moderno nga panahon, nausab ang ngalan niini nga mihaom sa description hinungdan nga gitawag na karon og ‘Blue Hole.’

Ang dapit nahimutang sa Barangay San Juan, Tuburan nga adunay gibana-bana nga gilay-on nga 5 kilometros gikan sa Poblacion.

Ang maong lugar gilibutan og mga kakahuyan. Siguradong ma-enjoy ninyo ang kanindot sa dili kasagaran nga hiyas sa kinaiyahan nga bugtong sa Tuburan lang ninyo masuwayan.

KALINGAWAN

Gawas sa paglangoy langoy o humol sa tin-aw ug bugnaw nga tubig sa tubod, mamahimong magpautaw-utaw sakay sa ilang kawayan nga balsa.

“The design is very nature’ pulong pa sa mga millennial nga nagpunay og kuha og hulagway sa maong lokasyon nga alang nila talagsaon nga experience.

Mamahimong mag-picnic bitbit sa inyong mga bawon ug imnunon sa ilang cottages, diin ang rates magdepende sa capacity nga mapaigo niini.

Sa mga buot mangaligo, adunay environmental fee nga P10 samtang sa ilang cottages P300 ang labing minos nga rate.

Aron mapabilin nga luwas ang mga guest, gitugot lang sa spring nga abli gikan sa 7am ngadto na sa 5pm.

UNSAON PAG-ADTO?

Ang lungsod sa Tuburan adunay gilay-on nga 46 kilometro kon manukad sa Dakbayan sa Sugbo nga gibana-bana nga molanat og usa ka oras ug tunga ang biyahe.

Sa kadtong adunay pribadong sakyanan, mamahimong mogamit og navigational app ug i-pin o search ang San Juan Elementary School o Barangay II, Tuburan.

Gikan sa maong dapit mamahimo rang magpatudlo o tultol sa mga lokal sa exact location sa Blue Hole.

Mamahimong mosubay sa Transcentral Highway via Busay/Balamban o via Toledo.

Adunay mga van-for-hire nga anaa sa Ayala ug IT Park Terminals nga mobiyahe og Tuburan.

Sa mga manukad sa Tabuelan, mahimong mosakay og bus sa North Bus Terminal paingon sa Tuburan via Lugo/Sogod.

Pag-abot sa lungsod, adunay mga habalhabal nga kasakyan paingon sa lokasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph