ANG populasyon sa Philippine Eagles o agila sa kalasangan nikunhod ngadto sa 392 pares gikan sa gibanabana nga 400 pares sa miaging mga tuig, sumala sa Philippine Eagle Foundation (PEF) niadtong Miyerkules, Mayo 31.
Si Jimbea Lucino, manedyer sa Culture-Based Conservation of PEF, nagbutyag nga "human activities" nga naghatag og peligro sa Philippine Eagles pabilin nga naglabi sama sa pagpamusil, mangayam, ug mamitik sulod sa ilang mga pinuy-anan.
Dugang pa niya nga ang mga lugar sa Philippine Eagles, nga kasagaran naa sa kabukiran ug lasang, nahurot na ug nameligro nga mahurot ang mga kahoy. Kasagaran sa mga puy-an sa mga agila makita sa Mindanao apan ubang mga lugar niini naa sa Leyte, Samar, ug pipila ka lugar sa Luzon.
“During the time of the pandemic, ang daming shooting and hunting na nagyari (so) marami rin kami ginawang rescue,” tug-an ni Lucino atol sa Media Forum niadtong Miyerkules.
Tungod niini, ang PEF padayon nga naningkamot sa pagkonserba sa populasyon sa mga agila pinaagi sa ilang conservation breeding program, apil na ang pagpahibalik sa natural nga puloy-anan niini.
Ang pinakaulahing katikaran, ang konstraksiyon sa bag-ong lugar sa PEF, eksklusibo alang sa konserbasyon ug breeding program sa mga agila, nagpadayon pa.
Hinuon, matud niya, hapit nang mahuman apan wala pay tukmang panahon kung kanus-a mabalhin ang mga agila. Gikanayon niya nga ang inisyal nga tulo ka paresan ibutang sa hilit nga lugar sa Barangay Eden, Toril District, Davao City. (ICM)