NAGKADAIYA ang nanggula nga espekulasyon sa mga netizens sa pagka-missing sa usa ka panday nga maoy mitabang sa lalaki nga gidagit didto sa Calinan, Davao City.
Unang pagduda sa mga netizens nga gidagit ang panday nga si Rodrigo Cadungog, 56-anyos, aron suma pa di kini makabutyag sa mga posibleng gisaysay ni Dennis Roy Panzan kaniya.
Si Panzan mao ang taga Barangay Calinan nga gidagit ug miingong gikulata siya, gipuposan, gitaptapan og packaging tape ang nawong, ug nakaikyas ug nakapangayo og pakitabang sa mga taga Barangay Matina Pangi.
Si Cadungog maoy unang naka-rescue kang Parzan ug gidala niini kang Barangay Kapitan Benjamin Badon dayon gidala ni Kapitan Badon sa Talomo Police Station, apan namatay si Parzan dihang miatubang na sa mga pulis sa Talomo PNP.
Si Panzan maoy usa sa mga nanga-missing sa Calinan, Davao City human sa hitabong paglugos ug pagpatay sa batan-ong architect nga si Vlanche Marie Bragas.
Migula sab ang espekulasyon sa mga netizens nga dunay dakong grupo sa mga kriminal ang mihimo niini kang Bragas, apan dako ang kasubo sa katawhan sa Davao City ug bisan sa social media human nga nangadamay ang mga "good samaritan" sama sa usa ka panday nga si Cadungog.
Si Cadungog nananghid nga mangita'g trabaho, Mayo 30, apan wala na kini kabalik sa ilang balay.
Tungod sa hitabo, gilayong nagpa-blotter sa kapulisan ang asawa niini nga si Elsa Cadungog ug nangayo'g tabang sa kapulisan aron nga makit-an ang iyang bana.
Sumala ni Police Major Noel Villahermosa, station commander sa Talomo PNP, nga nagpa-blotter ang asawa sa "missing" ug mipasalig ang kapulisan nga sa hinanaling panahon ilang makita si Cadungog.