KUNG mahitabo pa ang krimen sama sa paglugos ug pagpatay sa batan-ong architect nga si Vlanche Marie Bragas, hagiton suma pa ni kanhi Pangulong Rodrigo Duterte og pinusilay ang mga ginsakpan sa Davao City Police Office.
Kini ang gipamuhian nga pulong sa kanhi pangulo sa nasud atol sa programa niining "Gikan sa Masa Para sa Masa" sa SMNI, Miyerkules, Mayo 31, 2023.
"Alam mo, [kapag] maulit pa yan, puntahan ko kayo dyan pagsisipain ko kayo, really dalhin ko yong media tadyakan ko kayong lahat, hamunin ko kayo ng barilan. Why? For being idiots in the office. That's the last thing I'd want to do, to pay an idiot to stay there and do nothing," sumala ni Duterte.
Hinuon, miingon sab ang kanhi presidente nga dili siya motuo nga dili kayang sulbaron sa Davao City Police ang kaso ni Bragas, kay kung dili matud pa, mas maayong mang-resign sila sa ilang mga trabaho.
Gimandoan sab niini ang kapulisan nga pangitaon ang suspek.
"Pag wala kayong makitang suspect, then I suggest that... maghanap kayo ng tali, you hang yourself in shame,” dugang ni Duterte.
Sa giluwatan nga mga pulong sa kanhi pangulo, wala pa mipagula og pamahayag ang pamunoan sa sa DCPO.
Hinuon, sayo niini, nipasalig ang DCPO nga sa mosunod nga mga adlaw ipasaka na nila ang kaso batok sa mga suspek subay sa mga paghulagway sa mga testigo nga nakakita sa pagsakay ni Bragas sa kolor yellow nga Ombak, Mayo 16.
“Rest assured na in the next few days, mabigyang linaw na ang kasong ito,” sumala ni DCPO director Police Colonel Alberto Lupaz atol sa AFP-PNP Press Conference niadtong Miyerkules. (Uban sa taho ni Cheche Diabordo KAMM Media Network)