Ang mga graduwado sa elementarya gikan sa tulo ka mga barangay sa dakbayan sa Mandaue dili na kinahanglan nga mobiyahe sa laing mga dapit aron magtuon sa sekondarya tungod kay ang mga pampublikong tunghaan sa elementarya sa Barangay Cubacub, Basak ug Tawason sa dili madugay duna na unyay high schools alang sa umaabot nga academic year.
Ang mao nga inisyatiba gikasabutan atol sa tigom tali nila ni Mayor Jonas Cortes ug sa Local School Board sa Miyerkules, Mayo 31, matod ni City Councilor Malcolm Sanchez, chairman sa committee on education sa Huwebes, Hunyo 1.
Dugang ni Sanchez nga ang maong lakang nagtinguha nga ma-decongest ang mga high school sa Barangay Canduman ug Labogon.
“Existing na nga classrooms kay ang gamit natong classroom kay elementary raman, manghuwam tas elementary depende sa gidaghanon sa mga estudyante nga moeskwela,” butyag ni Sanchez.
“For example, sa Tawason nisulti si Teacher nga duna silay 79 ka mga grade 6 nga mo graduate sa elementary, mao nga ang mga ginikanan papirmahon og agreement sa DepEd nga kaning mga bataa sa Tawason High School moeskwela. So, mao na nga duha ka clasrooms sa elementary, so dili pa ta mogasto,” dugang pa niya.
Ang duha ka classrooms gamiton sa elementarya sa buntag ug high school sa hapon. Nagplano usab si Cortes nga magtukod og medium-rise school buildings tungod sa limitadong luna.
Ang ubang mga tunghaan walay available space, busa gikinahanglan ang pagpalit og mga lote alang sa dugang classrooms, pasabot sa mayor.
“We all know diri sa Mandaue ilabi na nga mahal sa ato yuta pero ato gipaningkamutan makakita tag luna nga matukuran para sa atoang additional school building,” matod ni Cortes.
Giawhag sa mayor ang kadagkoan sa matag tunghaan nga mosugyot og long-term nga plano aron ang mga sponsor o donors makasuporta sa ideya sa pagtukod og medium-rise school buildings aron masiguro nga dili mausik ang paggamit sa maong propiyedad.
Sa kadugayan, nidugang si Cortes, “naa silay plano para sa umaabot nga building construction o kinsa man ang mopuli sa principal naa silay follower nga naay certain area para blendable, naay para open space, compliance sa atong vision and mission sa usa ka resilient city.”
Tumong usab sa pagtukod og dugang mga pasilidad sa eskwelahan nga madasig ang mga tinun-an, ilabina kadtong dili part-timer, nga mobalhin sa day classes aron dili sila makapauli sa gabii.
Sa pagkakaron, duha ka tunghaan ang nagpahigayon og night classes -- Mandaue City Comprehensive National High School ug Casili Night High School. (HIC)