Magpinaksitay karong buntag, Biyernes, Hunyo 2, ang Denver Nuggets ug Miami Heat alang sa game 1 sa best-of-seven National Basketball Association (NBA) Finals sugod sa alas 8:30 sa buntag (RP time).
Ang uhaw ug gutom nga Nuggets pangulohan nila ni Nikola Jokic ug Jammal Murray samtang ang Heat bidahan nila ni Jimmy Butler ug Bam Adebayo kinsa manulong sa siyudad sa Denver alang game 1 ug 2.
Si Jokic nihulagway nga kini maoy labing lisod nga kahimtang sa ilang kinabuhi isip basketbolista apan ila na kining gipangandaman ug iyang gipalanog nga walay inilog niining maong inilugay sa Larry O’Brien trophy.
“This is going to be the hardest game of our life, and we know that,” matod ni Jokic. “We are prepared for that. We are prepared for that. So, I think there is no favorite. Definitely, I think we are not favorites in this series. I think they’re not either. I think it’s just the finals,” dugang ni Jokic.
Si Aaron Gordon, power forward sa Nuggets, nagkanayon nga dili sila mokumpyansa sa Heat sanglit dili na moepekto ang seeding sa NBA Finals.
Iyang gikonsiderar ang Heat (#8 seed) nga dakong hulga alang sa ilang gitinguha nga kampyonato.
Ang star sa Heat nga si Butler nagkanayon nga andam na silang moatubang sa number 1 seed nga Nuggets ug sila wala mahulga.
“I would like to say that I’m never rattled. I’m very calm. I’m very consistent in everything that I do, whether it’s before the game, after the game, during the game, and I think when my guys look at me like that, they follow suit in every single way. I love that about them because they’re never shook. No matter what,” padayag ni Butler sa interbyu sa The Associated Press.
MANAGLAHING DA’N
Kini maoy labing una nga NBA Finals diin ang mga lider sa matag team wala masulod sa top 10 atol sa NBA draft.
Si Jokic maoy 41st overall pick sa 2014 ug si Butler ika-30 nga gi-pick sa 2011 NBA Draft, apan silang duha adunay 11 time All-Star appearance gumikan sa abilidad nga ilang gipakita sa NBA.
Ang Nuggets adunay mas sayon nga dalan paingon sa NBA finals diin sila ang number 1 seed Western Conference standing sa tunga-tunga sa Disyembre ug wala monaog, nagpabilin nga No. 1 seed pinaagi sa 12-3 win-loss sa West playoffs.
Ang Miami nga kapito na nasulod sa NBA Finals, nangita sa ikaupat nga titulo ug maoy niagi sa labing lisod nga dalan paingon sa NBA Finals.
Kinahanglan pa silang molusot sa play-in elimination game aron lang makasulod sa playoffs, ug ilang gi-knockout ang No. 1 overall seed nga Milwaukee Bucks sa Round 1, ang kaatbang nga New York Knicks sa Round 2 ug kinahanglan pang modaog sa Game 7 batok sa Boston.
Hapit mausik ang 3-0 nga labaw, aron ipanimalos ang ilang kapildihan sa miaging season sa Celtics sa East finals.
Sa 44-38 karon nga season, ang Miami nitabla sa labing ubos nga regular-season record sa team nga nahimong NBA champion.
Unang team nga nakahimo niini mao ang Washington Bullets nga nidaog sa titulo niadtong 1978.
Adunay 10 ka teams nga nihuman sa karon nga season nga adunay mas maayo nga mga rekord kay sa Miami - siyam niini wala na nakaduwa ug laing 589 ka teams sa kasaysayan sa NBA nga adunay mas maayo nga regular season record itandi sa 2022-23 Heat apan wala gihapon nakadaog og titulo. (PAC)