Pataka'g labay og basura pamultahon

Hulagway kuha ni Jeepy P. Compio
Hulagway kuha ni Jeepy P. Compio

ARON mas mapatuman ang Ecological Solid Waste Management Ordinance sa dakbayan, gitakda sa City Environment and Natural Resources Office (Cenro) nga i-deputize ang mga opisyal ug enforcer sa barangay ug hatagan sila og awtoridad sa pagpanakop ug pagsilot sa mga makalapas sa maong ordinansa.

Ubos sa Ordinance 0706-21, ang mga indibiduwal mahimong pamultahon og P500 tungod sa dili paglainlain sa ilang mga basura samtang ang mga nasayop nga establisemento kinahanglang mobayad og P5,000.

Bisan pa nga ang ordinansa adunay mga probisyon nga nagmando sa mga barangay functionaries isip kabahin sa enforcement body, ang mga opisyal sa barangay dili gihapon makapamulta sa mga molapas niini tungod kay kadaghanan sa mga barangay enforcers wala pa ma-deputize sa Cenro.

Si Cenro Information Education Campaign Team Leader Mark Anthony Gumban niingon nga nakig-alayon ang ilang buhatan sa nagkadaiyang barangay sa dakbayan aron ma-schedule ang deputation seminars sa mga barangay enforcer aron matubag ang problema.

“So far, naga-coordinate nako ani sa mga barangays na mag-conduct sila og deputation seminar para maka-issue na sila og citation tickets,” ingon ni Gumban atol sa Go Clean, Go Green program nga nabati sa Davao City Disaster Radio niadtong Martes.

Dugang sa opisyal, “In fact, naa nay tentative schedule by June or July 2023 na magpa-conduct sila og deputation seminar para ma-deputize na ang ilang mga enforcers or tanod so that they can now issue citation tickets sa mga violators."

Si Gumban niingon nga human ma-deputize, ang mga barangay enforcer mahimong maka-issue og citation ticket sa mga residente nga dili mag-segregate sa basura ingon man niadtong wala mosunod sa gitakdang schedule ug lokasyon sa pagkolekta sa basura.

Kini maghimo sa mga barangay nga dili na magsalig sa CENRO sa pagpatuman sa ordinansa ug pagmintinar sa usa ka nagkahiusa ug episyente nga solid waste management scheme.

Si Gumban niingon nga ang Baranagy 28-C usa sa mga barangay nga nihangyo nga ipa-deputize sa Cenro ang ilang enforcer karong tuiga.

“Approved na to ang ilang budget for the seminar so tuloy-tuloy na na siya. Pwede na sila maka-issue og citation ticket after the deputation seminar, so dili na sila manawag sa amoa kung naay problema. Pwede na sila maka-act, pwede na sila maka-issue og citation without the Cenro personnel,” ingon ni Gumban.

Ang mga barangay nga gustong ma-deputize ang ilang enforcer kinahanglan lang nga mohimo og hangyo ug makig-alayon sa Cenro aron adunay gikatakdang deputation seminar alang sa ilang mga opisyal. (JPC/CIO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph