PADAYONG gipangita sa mga awtoridad ang kaubanan nga nakaikyas sa tulo ka mga suspek nga napatay sa mga awtoridad atol sa search warrant operation alas 7:45 sa buntag, Huwebes, Hunyo 1, sa Matalam, Cotabato Province.
Ang pursuit operation sa Matalam Municipal Police Station gipangulohan ni Lieutenant Colonel Arniel Melocotones.
Nasayran nga mga napatay sa notadong grupo mao sila Abdulkarim Unsil alyas Dekit Unsil, 38, minyo; Gerald Mangiling; ug Kanacan Unsil nga mga molupyo sa Sitio Kisupit, Barangay Marbel, Matalam.
Laing usa nila ka kauban nadakpan sa mga awtoridad nga si Singcala Kalunsing, nagpuyo sa Sitio Ambel, Barangay Marbel.
Gibutyag ni Cotabato Police Provincial Office Director Colonel Harold Ramos nga nagpahigayon og search warrant operation ang hiniusang puwersa sa Regional Intelligence Division (RID 12), Philippine National Police-Special Action Force (PNP SAF), Highway Patrol Group (HPG 12), 602nd Brigade ug 90th Infantry Battalion, Philippine Army batok sa mga suspek sa Sitio Kisupit Barangay Marbel sa Matalam.
Apan pasulod pa lang ang raiding team sa ilang target, gipabuthan na sila sa grupo ni Unsil.
Napugos sa pagbalos ang mga awtoridad, hinungdan nga sa binakbakay milungtad og napulo ka minutos.
Nadala pa sa balay tambalanan ang mga samaron apan gideklara sila sa doktor nga patay na.
Narekober sa mga napatay ang P182,250 nga kantidad sa shabu, duha ka kalibre .45 nga pistola, usa ka .38 revolver, mga bala, magazines, pito ka motorsiklo ug mga personal nga kagamitan.
Ang search warrant giisyu ni Acting Presiding Judge Allan Edwin Bongcavil sa 12th Judicial Region, Branch 19 nga may petsa Mayo 30, 2023 sa paglapas sa Republic Act 9165 Artcle II, Section 11.