Ang Land Transportation Office (LTO) Mandaue City District Office moabli na sa dili madugay, ang regional director mipahibalo niadtong Biyernes, Hunyo 2, 2023.
Sa Facebook live sa Hunyo 2, 2023, si LTO-7 Director Victor Caindec, nilibot sa labing bag-ong buhatan sa ahensya nga nahimutang sa ikatulong andana sa City Times Square II, Barangay Tipolo, Mandaue.
Ang buhatan sa distrito sa LTO Mandaue gibalhin sa bag-ong lokasyon human gisirad-an ang karaang lokasyon sa J Center Mall sa A.S Fortuna Street.
Ang bag-ong buhatan butangan sa Motor Vehicle Registration and Licensing section sa ahensya, nga gibanabana nga makaatiman sa 80-90 ka mga aplikante matag higayon.
Apan matod ni Caindec nga wala pay tentative date sa aktuwal nga petsa sa pag-abli, diin iyang gipasabot nga nagpaabot pa sila sa usa ka nahabilin nga pirma sa taas nga opisyal aron magsugod ang operasyon niini.
NAGDAYEG
Ang Integrated Bar of the Philippine Cebu City Chapter (IBP-CCC) nipasar og resolution nga nagdayeg sa LTO 7 sa lig-on niining suporta sa tanang legal, developmental, humanitarian, ug allied services ug mga inisyatiba sa organisasyon.
Pinaagi sa usa ka resolus_yon nga gipasar niadtong Marso 31, 2023 apan bag-o lang nadawat sa regional director, ang IBP nipasalamat kang Caindec sa paghimong posible sa panagtambayayong human nakadawat ang chapter og daghang awards ug recognition atol sa 20th Founding Anniversary sa IBP Philippines.
“LTO Region VII strongly supported IBP Cebu City’s City-wide Legal Aid Caravan and City Hall at Your Doorsteps and Voter Registration Caravans,” mabasa sa resolution.
Gitataw sa organisasyon nga taliwa sa mga hagit tungod sa kagamay sa mga pundo alang sa iyang tumong sa pagserbisyo sa publiko, ang panagtambayayong tali sa LTO ug IBP-CCC naghimong posible sa pagpahigayon sa 82 ka caravans sa duha ka lalawigan, tulo ka mga siyudad, unom ka mga lungsod, 57 ka barangays ug duha ka mga barangay nga isla.
“The aforesaid partnership paved the way for LTO Region VII to work closely with the IBP Cebu City and participate in the meaningfully conceptualized and outstanding legal developmental, humanitarian, and allied services,” dugang sa resolution. (EHP, REV gikan sa PR)