Mokabat sa 149 o 15 porsiyento pa lang sa gibanabana nga 1,000 ka gipang-impound nga mga sakyanan ang na-release sa ilang pasilidad sa impounding section sa Traffic Enforcement Agency of Mandaue (Team) sa Barangay Centro, Mandaue City.
Si Hyll Retuya, legal head ug ang bag-ong admin head sa Impounding Section sa Team, niingon sa Miyerkules, Mayo 31, 2023, nga 145 ka impounded nga mga sakyanan gi-release gikan sa Mayo 22 hangtod ning pagsuwat.
Subling gipasabot ni Retuya nga gusto niya nga paspas ang proseso sa pag-release sa impounded nga mga sakyanan ug pag-decongest sa pasilidad.
Dugang ni Retuya nga gusto nila nga pasimplehon ang proseso o maminusan ang mga kinahanglanon aron mabalik ang mga sakyanan sa ilang mga tag-iya.
Matod ni Retuya nga dunay mga tag-iya sa mga sakyanan nga naglisod sa pagkuha sa ilang unit tungod sa kalisod sa proseso ug kadako sa gastuhon sa pag-claim niini.
Matod niya nga pipila sa mga rason kon ngano nga ang mga tag-iya dili molukat sa ilang gi-impound nga sakyanan mao ang kadaghan sa mga rekisitos nga magpabug-at ug magpalisod sa paglukat kay dako usab ang gastuhon.
ORDINANSA SA AMNESTIYA
Aron kini mahitabo, usa ka ordinansa ang giduso ug gipalabang sa Konseho sa dakbayan.
Si Councilor Jimmy Lumapas, chairman sa committee on transportation, nipasar sa ordinance D.O No. 211-2023 o “An ordinance granting relief and or/ amnesty to all declared owners of the impounds vehicle from the payment of the accumulated storage fee”.
Giaprobahan kini sa unang pagbasa niadtong Lunes, Mayo 22, 2023, dayon gipasa sa committee on laws. Karong Lunes, Hunyo 5, ipahigayon ang ikaduhang pagbasa sa regular session sa Mandaue City Council.
Kon kini maaprobahan, hatagan og amnestiya ang mga tag-iya sa gi-impound nga mga sakyanan aron husayon ang ilang mga kalapasan sa trapiko sa ingon ma-claim ang ilang mga unit.
Base sa ordinansa, gihatagan og tulo ka buwan ang mga tag-iya sa na-impound nga mga sakyanan sa pag-claim sa ilang units.
Dugang pa, ang mga drayber sa public utility vehicle (PUV) kinahanglan nga susihon base sa ilang nangaging mga kalapasan sa trapiko sa dili pa nila ma-claim ang ilang mga sakyanan.
DRAYBER
Ubay-ubay nga mga tag-iya ang nipadayag og kalipay nga mahatagan sila og higayon nga ma-claim ang ilang unit ug maminusan ang mga bayranan.
Si Gregg (di tinuod niyang ngan), 34, taga Barangay Alang-Alang, niingon nga sukad na-impound ang iyang motorsiklo tungod sa expired nga rehistrasyon niadtong Disyembre 2022, isip habalhabal driver, siya gipahunong sa pagpanginabuhi sulod sa pipila ka buwan ug nahimong “houseboy” nga nag-atiman sa ilang duha ka mga anak samtang ang iyang asawa nagtrabaho sa mall isip sales lady.
“Nindot na kay dili mi maglisod og kuha na ana sa motor,” matod ni Gregg.
Si Raymond Dolorido sa Banawa, dakbayan sa Sugbo, nibisita usab sa buhatan sa Team niadtong Miyerkules, Mayo 31 aron pagsusi kon unsaon niya pagkuha sa iyang na-impound nga sakyanan niadtong Martes, Mayo 30, tungod kay way rehistro tungod sa kakuwang sa mga dokumento.
“Lisod kon way motor, dili magamit ni’g trabaho,” matod ni Dolorido.
Alang sa gi-impound nga sakyanan gikan sa Enero 2020 hangtod sa Disyembre 2022, ang bayranan anaa sa P1,000 alang sa kinatibuk-an nga pagtipig, walay labot ang mga silot, towing fees, ug surcharge, ug uban pang kantidad nga makita sa traffic citation ticket.
Bisan wala pa makahatag og numero, si Retuya niingon nga 95 porsiyento sa na-impound nga mga sakyanan pribado samtang 5 porsiyento ang mga PUV. (HIC)