Piniyalan sa coffee shop gisuwayan sa pagpusil

Piniyalan sa coffee shop gisuwayan sa pagpusil

Sinaligan sa usa ka coffee shop sa dan Urgello, Barangay Sambag 1, siyudad sa Sugbo, suwerting nakalingkawas dihang gipusil sa riding in tandem nga kalit nga niabot sa gawas sa Huwebes sa gabii, Hunyo 1, 2023.

Ang biktima mao si Elmer Suralba Danong, hamtong, lumolupyo usab sa naasoy nga barangay, nagdumala sa coffee shop.

Kasuya sa trabaho ang iyang gituohang motibo.

Matod ni Danong nga nakabantay siya nga ang gunman nibunot sa iyang armas hinungdan nga dali siyang nihapa uban sa iyang kustomer nga si Daryl Añianza Gomez, 22, nga nagkape samtang gihan-ay niini ang iyang resume.

Si Danong nihulagway nga ang nahitabo maoy ikaduha ug parehong naluwas siya sa tino nga kamatayon.

Gisaysay ni Danong nga sa wala pa ang insidente, naa siya sa sulod sa coffee shop samtang nagbuhat sa iyang tahas.

“Nakita gyud nako nga miaksiyon siya og bunot mao nang mihapa ko dayon unya mao na to buto-buto na ang akong nadunggan,” matod ni Danong.

“Wala ra koy tatsa mao nang nagpasalamat gyud ko sa Ginoo oi, actually sa pagka human nako, nibati og kahadlok pero dihang sa pagpusil nako, wala pa ko ato nahadlok gyud,” asoy ni Danong.

Gituohan niya nga pangabubho sa posisyon sa trabaho nga iyang nakab-ot karon kay ang unang piniyalan sa coffee shop gipapahawa sa tag-iya.

Dugang niya nga kaila siya mismo sa nagtira kaniya kay sila nagtinutokay sa gunman sa wa pa siya suwayi pagpusil, apan wa siya nisulti kon si kinsa.

Sila si Chief Master Sergeant Jeptha Jumawan sa Abellana Police Station nga nag-imbestigar sa hitabo nangita og CCTV cameras nga makatabang kanila sa pag-ila sa gunman. (BBT, TPT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph