Nakabantay ka ba sa mga balita? Maghilak ang adlaw kon way magbandera nga krimen ug dinagko o ginagmay nga pagkasakmit sa gidiling drugas.
Ang drugas ug krimen kanunay mag-uban. Dunay mga imposibling kaso sa ngilngig nga krimen apan nahimo tungod sa gahom sa drugas.
Mibalik kini nga sitwasyon human sa pagluag sa restrictions sa pandemiya sa Covid-19, ang kriminalidad namatikdan nga misaka.
Ug sa kanunay, ulahi na ang pagmahay.
Sama sa usa ka truck boy nga giingong sangko sa langit ang iyang pagbasol human napusasan sa mga ahente sa Philippine Drug Enforcement Agency (PDEA 7) sa Barangay Pulangbato, dakbayan sa Sugbo niadtong Huwebes sa hapon, Hunyo 1, 2023.
Matod pa, wala siya magdahom nga ang iyang kasabot mga sakop sa PDEA 7.
Nakuhaan si Daniel Sabanpan sa gidudahang shabu nga mobalor og kapin P300,000 subay sa standard drug price (SDP).
Sa social media migawas dayon kini nga taho ug karong adlawa, Sabado, Hunyo 3, 2023, magbandera sa tradisyonal nga media.
Usa lang kini ka ehemplo nga matag adlaw dunay taho nga susama niini. Dili sama niadtong diha pay estriktong restrictions sa panahon sa pandemiya sa coronavirus disease 2019 (Covid-19) ug administrasyon ni kanhi Presidente Rodrigo Duterte nga seryuso sa iyang gubat nga gilusad batok sa pagpahuyot sa gidiling drugas.
Sa naasoy nga panahon, linaw kaayo. Ang tanan dunay pagpanagana labina sa mga ilegalista nga daling masakpan ang lihok atol sa lockdowns.
Wala kita mangandoy nga mobalik pag-ataki ang virus. Lisod usab sa atong panglawas.
Ug karon maghilak ang adlaw kon wala kining matang sa balita o panghitabo sa palibot. Apan maghilak ang atong kinabuhi kon dili kini masanta. Ang hulga kanunay naa sa palibot.
Hagit nato kining tanan. Dili bugtong responsibilidad sa awtoridad o PDEA ang pagpanday sa malinawong kinabuhi sa sadya nga komunidad.