Ang Mandaue City Animal Bite Treatment Center (MCABTC) nakatala og kinatibuk-ang 3,655 ka mga kaso sa pagpamaak sa mananap sa unang upat ka buwan ning tuiga.
Sumala sa datos gikan sa sentro, adunay 764 ka kaso sa pagpamaak sa hayop sa Enero, 742 sa Pebrero, 1,027 sa Marso, ug 1,122 kaniadtong Abril.
Ang lima ka mga barangay nga adunay labing daghang kaso mao ang Paknaan nga adunay 305, Tipolo nga adunay 222, Canduman nga adunay 193, Pagsabungan nga adunay 187, ug Umapad nga adunay 185.
Si City Councilor Nerissa Soon-Ruiz, chairman sa committee on health sa Konseho, niingon niadtong Biyernes, Hunyo 2, nga ang mga kaso sa rabies kasagaran tungod sa mga libud-suroy nga iro.
“Kani atong mga stray dogs kasagaran ani maoy naay rabies kay wa may klarong pagkaon. Ara ra sa mga basura magkaun-kaun unya init kaayo way inom-inom og tubig mao gyud na kasagaran. It’s not the pet animals nga maoy naay rabies,” matod pa ni Ruiz, nga usa ka doktor.
Gipahinumdoman ni Soon-Ruiz ang mga tawo nga napaakan sa iro o iring nga tambalan ang ilang samad pinaagi sa paghugas niini og tubig ug detergent aron malikayan ang impeksyon, ug likayan ang pagbutang niini og suka o ahos.
Ang Mandaue City Health Office nanghatag og libreng anti-rabies vaccination alang sa bisan unsang edad sa oras sa opisina gawas lang sa Miyerkules.
Kaniadtong Huwebes, Hunyo 1, ang opisina nakaatiman og 300 ka mga pasyente nga adunay mga kaso sa pinaakan sa hayop.
Matod ni Soon-Ruiz nga ang MCABTC nag-accommodate usab sa mga tawo gikan sa mga silingang lugar sama sa Consolacion ug Liloan.
Sa laing bahin, ang City Veterinarian Office niingon nga adunay kinatibuk-ang 7,445 ka iro ug 1,304 ka iring ang nakadawat og anti-rabies vaccine sa mga buwan sa Enero hangtod Mayo ning tuiga. (HIC)