Usa ka 18 anyos nga anak nagpakitabang sa kapulisan sa lungsod sa Tuburan, tunga-tungang kasadpan sa Sugbo human giingong siya gipanamastamasan sa iyang amahan.
Si Police Lieutenant Colonel Bryan Salvacion, hepe sa Tuburan Police Station, nibutyag nga nireklamo ang biktima sa ilang buhatan niadtong Mayo 28, 2023, human gisuwayan na usab siya og hilabot sa iyang amahan niadtong Mayo 26, 2023 apan napakgang tungod kay may niabot nga bisita.
Matod ni Salvacion nga ang biktima nga si Mars (ngan gipugngan), lumolupyo sa usa sa barangay sa Tuburan, nidangop sa ilang buhatan kay wa na kaaguwanta.
Ila kining gipaubos sa eksaminasyon sa Pink Room sa Vicente Sotto Memorial Medical Center (VSMMC) ug nagpositibo nga nahilabtan.
Apan ang gikabalak-an sa kapulisan sa Tuburan nga di mopadayon sa pagsang-at og kaso ang biktima batok sa iyang amahan kay gihangyo kini sa pamilya mismo nga dili mopadayon.
“Nabalaka ta kay mga igsuon man gud ani pulos mga babaye mao nga among gipasusi sa among WCPD (Women and Children Protection Desk) kon unsa gyud ang desisyon niini sa pagpasaka og kaso,” matod ni Salvacion.
Ilang nasayran nga ang unang pagpanghilabot sa iyang amahan nahitabo niadtong Nobiyembre 2022 samtang ang ikaduha niadtong Disyembre 2022 ug ang ikatulo unta wala nadayon sa miaging buwan.