World Bicycle Day kagahapon nga gideklarar sa United Nations General Assembly niadtong 2018 aron pag-ila sa maayong mga gamit sa biseklita isip transportasyon, alang sa panglawas, ingon man sa kalikupan.
Ang biseklita simple kaayo nga sakyanan. Ubos kaayo og maintenance ug mapalit ni bisan kinsa, kabos man o adunahan. Kon ikaw trabahante nga nagdaginot sa pletihan, ang bike nindot kaayo nga alternatibo nga sakyanan gikan sa balay padung sa trabahoan, vice versa.
Sa imo usab nga pagsikad labing minos 30 minutos matag adlaw, maayo na kaayo ni nga epekto sa imong panglawas, labina sa kasingkasing. Nakadaginot ka na, naa ka pay cardio exercise kada adlaw.
Sa amoang road revolution kaniadto, namatud-an na nga mas minos ang sakyanan, motidlom usab ang pollution sa dalan. Sa mga kalihukan, dunay mga higayon nga ang kagamhanan nisukod sa pollution level sa dapit nga wa agii sa mga sakyanan. Miminos og maayo ang polusyon sumala sa ilang nakita.
Ang air pollution usa sa mga dakong hinungdan sa nagkadaiyang mga sakit, apil na ang lung cancer ug sakit nga respiratory.
NAKAPATAY
Niadtong 2019, mao ni ang gitumbok nga hinungdan sa kamatayon sa labing minos 4 milyunes ka mga tawo, sagad naa sa mga kabos ug middle income nga mga nasod sa Southeast Asia, nga naglakip sa Pilipinas.
Bisan ning mao nga mga kasayuran, way puas ang pagdaghan sa mga sakyanan samtang nagkaarang-arang ang kahimtang sa mga Pinoy. Nanaghan usab ang mga motorsiklo tungod sa grabeng kahimtang sa trapiko. Kon gusto kang madali sa pag-abot sa point A to B, pagmotor.
Nakita sa yanong mga tawo nga ang motorsiklo maoy solusyon sa problema. But alang nako, mao ni ang simtomas sa kapakyasan sa kagamhanan sa pagsulbad sa suliran sa trapiko ug kakuwang sa transportasyon sa hilit nga mga dapit.
Wa ka magkinahanglan og motorsiklo kon nagpuyo ka mga 10 kilometro gikan sa imong trabahoan ug di kaayo effort ang pagtindak, sama nianang namuyo sa kabukiran.
KAUSABAN
Usa sa akong nakita nga mga hinungdan sa di maayong implementasyon sa suporta sa biseklita mao ang kakuwang og konsultasyon ug planning sa kagamhanan sa pagbutang og mga imprastraktura dinhi sa nasod.
Sagad gigamit lang ang mga proyekto alang sa pampogi points kay wa may klarong resulta ang mga proyekto, gawas lang tingali sa Iloilo City. Apan dinhi sa Sugbo, makapaguol kaayo kay wa may kausaban. Ang mga nagbiseklita maorag third class citizens kay ang mga nagmotor mao na may second class.
Bisan gud og nagsubay na sa bike lane, businahan, babagan sa four ug two-wheeled nga mga sakyanan. Kada adlaw ko nakaksaksi ani sa Dan P. del Rosario. Di ba, angay unta nga priority ang biseklita sa bike lanes bisan kon kini shared? But lahi ang nahitabo, ingon sa buta ang mga drayber.
Mao nang niingon ko nga unaha ang pagpatuman sa mas dali ug sayon nga probisyon sa bike lane ordinance sa Cebu City nga mao ang paghawan sa bike lanes ug pagbadlong, dalang pag-edukar sa mga drayber.
Isunod ang pagpasul-ob og bicycle helmet ug blinkers ingon man counterflowing, masuko man ang publiko o di. Kay kini tipik sa road safety, alang ra sab sa kaluwasan sa mga biker.