Duna karoy kagubot sa Board sa Metro Cebu Water District (MWCD) human gisuwayan og pahulip ni Mayor Michael Rama si manlalaban Joey Daluz isip chairman niini.
Human sa mao nga lakang, nibuak sa iyang pagpakahilom si Daluz, nipasangil nga dunay duha ka mga tumong ang mayor sa suway nga paghulip kaniya. Kini may labot sa giingong privatization sa water firm ug politika.
Nipasangil si Daluz nga gusto sa mayor nga himuong pribado ang water firm nga matod niya iyang gisupak kay momahal ang presyo sa tubig sa mga Sugboanon. Ikaduha mao ang politika nga giingon niyang nagagumikan sa iyang sugyot nga hatagan og dalan ang mga batan-on sa ilang partido nga makadagan sa mas taas nga posisyon kay gusto ang publiko og batan-on, presko nga ngan.
Mao ni ang iyang gituohan nga nakaaghat kang Rama sa pagpahulip kaniya.
Tinuod man o di ang gisulti ni Daluz, di kini maayong tilimad-on sa pulitikanhong organisasyon nga duna nay liki daan sukad niadtong 2019 elections apan temporaryong nahilot tungod sa pagpatunga sa impluwensyadyong mga tawo. Niadtong panahuna, gusto ni Rama nga maoy standard bearer sa ilang partido, apan si anhing mayor Edgardo Labella ang nipatigbabaw samtang siya ni slide sa pagka bise mayor.
Sa 2022 elections, si Rama ang standard bearer sa partido ug kinabag-an sa ilang mga kandidato nangapili hinungdan nga mayoriya ang ilang naangkon nga mga lingkuranan sa mga Konseho.
Apan di ba kaha mausab ang kamada sa Konseho sa umaabot nga mga buwan kon di mahilot kining bag-ong mga kalamboan? Di baha kaha pasiuna lang kini sa umaabot pang sinikhanay sa pulitika sa dakbayan sa Sugbo?
Bahala na og unsay dagan sa pulitika basta kay ang pagserbisyo nga dali ug matarong di mapornada sa politika. Nangahitabo na ra ba kaniadto nga tungod sa away sa pulitika, daghang mga proyekto ang nangapagan hinungdan nga hinay ang dagan sa serbisyo.