Canyoneering sa Matutinao gidili una sa Kapitolyo kay kuyaw pa

Gimando ni Cebu Governor Gwendolyn Garcia nga wala una’y tugotan nga mag-canyoneering sa Matutinao, lungsod sa Badian sugod karong adlawa.

Kini subay sa giluwatang lagda ni Garcia Executive Order No. 14, human nasuta sa usa ka joint inspection sa nagkadaiyang buhatan nga adunay mga estruktura ug metallic spikes nga makahatag og peligro sa mga gustong mosuway sa canyoneering activity sa lugar.

Ang sakop sa Municipal Engineering Office (MEO), Municipal Disaster Risk Reduction and Management Office (MDRRMO) ug Municipal Tourism Office (MTO) sa lungsod maoy nisusi sa falls diin nakita ang mga metal spike duol sa nabantog nga Kawasan Falls.

Gawas sa mga metal spike, gilikayan usab ang posibling disgrasya sa mga turista ug mga bisita tungod sa nagbarog gihapon nga mga karaan ug giabandona na nga mga estruktura nga anaa nahimutang sa easement zones sa Kawasan falls.

“...any injury resulting from the gross neglect of the possible dangers that these illegal structures and dangerous ruins may cause to the public would definitely adversely affect the tourism industry of Cebu,” mabasa sa EO ni Garcia.

Subay niini, gimandoan ni Garcia ang kapulisan sa kanunay nga pagsusi ug pag implementar sa mando.

Sa kasamtangan, wala pa’y petsa kon kanus-a mobukas pagbalik ang canyoneering activity sa lugar.