Human sa 13 ka tuig, duna pay wa mituman sa plastic ban

File photo
File photo

Giangkon sa mga opisyal sa Mandaue City Environment Resources Office (MCENRO) nga bisan pa sa lapad nga pagpatuman, pipila ka mga negusyo sa dakbayan padayong wala magtagad sa balaod sa plastic ban sa Dakbayan.

Si Mark Oplado, focal person sa Monitoring and Enforcement Unit (MEN) sa MCENRO, nipasabot sa SunStar Cebu niadtong Biyernes, Hunyo 2, nga posibleng dili sinati ang gagmay’ng mga negosyo, sari-sari store, ug mga tindera sa mga merkado publiko sa mga regulasyon sa Dakbayan.

Ang plastic bag prohibition ordinance sa dakbayan nahimong balaod niadtong 2010 kun 13 ka tuig ang nakalabay, nga nag-require sa paggamit og paper bags, cloth bags, eco-bags ug reusable bags sa mga business establishments, apil na ang mga restaurant ug sari-sari stores, gawas niadtong namaligya og basa nga mga butang ug construction materials.

Ang mga makalapas pamultahon og P500 o pagkapriso hangtod sa lima ka adlaw o ang duha depende sa desisyon sa korte.

Apan nadoble ang bayronon niadtong 2018 dihang giamendahan ang ordinansa.

Sa dihang ang ordinansa gipailalom sa katapusang kausaban niini niadtong 2021, ang paggamit sa mga plastic straw gidili ug ang silot gipaubos sa P500.

Gihisgutan ni Oplado ang mga programa sa impormasyon, edukasyon, ug komunikasyon (IEC), pagpatuman, pagmonitor, ug paghatag og eco-bags sa kadaghanan sa mga komersyal nga negosyo isip pipila sa mga interbensyon nga ilang gihikay aron mapalapdan ang kasayuran sa katawhan sa balaod.

“The office involves stakeholders, especially commercial enterprises in implementing the ordinance. The office actively and passively enforced the ordinance using our deputized eco-enforcers. In order to maximize the city’s anti-littering ordinance into effect, the office also worked with the Mandaue PNP (Philippine National Police),” matod ni Oplado.

Sa datus nga gihatag sa MCENRO ngadto sa SunStar Cebu, nius-os ang ihap sa mga tawo nga nakadawat og tiket tungod sa paglapas sa ordinansa, gikan sa 321 niadtong 2017 ngadto sa 283 sa 2018, ngadto sa zero sa 2022.

Si Michael Edrial, Supervising Environmental Management Specialist, miingon nga ang Covid-19 pandemic nakatampo usab sa pagkunhod sa mga plastik nga materyales nga gigamit tali sa 2020 ug 2022.

Hinuon iyang gitataw nga mahimong sayo pa kaayo aron madeklarar ang epekto sa pagpatuman sa ordinansa.

Si Konsehal Jennifer Del Mar, chairperson sa committee on environment, niingon nga di pa nila hisgotan kon dugangan ba nila ang silot.

Pipila ka mga tag-iya sa sari-sari store supak kon ang silot umentohan na usab ngadto sa P1,000.

Si Sel (dili tinuod nga ngalan), 45-anyos nga residente sa Barangay Subangdaku, nangatarungan batok sa pagpataas sa bayrunon ug gikuwestiyon unsaon niya pagpadayon sa pagsuporta sa iyang kaugalingon kon ang tanan nga P500 nga kinitaan gikan sa iyang sari-sari store moadto sa pagbayad sa multa.

Laing tag-iya sa sari-sari store nga si Donald, niingon nga ang Kagamhanan sa Dakbayan kinahanglang motutok hinuon sa hustong pagbahig sa mga basura, ug nidugang nga dili malikayan ang paggamit sa mga plastik nga materyales.

“Dili malikayan makagamit jud tag plastic kay paper bag magisi man dayon. Ako lang jud ilabay ug tarong sa basura nya separate sa mga malata ug di malata,” ni Donald. (HIC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph