Nahinumdom ka pa ba niadtong report nga nitumaw nga gitanyagan og makalibat nga kantidad sa kontrata ang Sugbuanong star sa Philippine Basketball Association (PBA) nga si RR Pogoy niadtong panahon sa Covid-19 pandemic?
Ang tanyag nagpabilin nga sekreto sanglit wala nay niugkat niini nga mga tigbalita sa paugnat sa kusog apan niining bag-ohay lang, gikumpirma kini sa agent sa lumad nga taga City of Talisay.
Base sa column ni Homer Sayson, kinsa tua na nagbase sa Amerika nga napatik sa Spin.ph, kini gikumpirmar mismo ni Edgar Mangahas.
“Totoo naman. Matagal na nga ‘yun eh,” matod pa sa agent ni Pogoy nga si Mangahas.
Samtang wala gisaysay ni Mangahas kon pila ang tanyag sa Japan B. League ngadto sa star sa Talk ‘N Text, ang team nga maoy gusto nga makakuha sa serbisyo ni Pogoy, nitug-an kang Sayson sa makadani nga package sa kontrata.
Ang maong kontrata nagkantidad og P1.2 milyunes matag buwan sa unang usa ka tuig.
Kon maayo ang performance nga ipakita sa PBA star, ang iyang tulo ka tuig nga sunod nga kontrata magkantidad na og P1.3 matag buwan sa unang tuig, P1.4 milyunes sa ikaduhang tuig ug P1.5 milyunes matag buwan sa katapusang tuig sa iyang kontrata.
Sa pangutana kon mobiyahe na ba si Pogoy paingon sa Japan sa pag-expire na unya sa iyang kontrata, si Mangahas nagkanayon nga dili kayang talikdan sa Sugboanon ang TNT.
“Loyal si Roger sa TNT. It’s the only PBA team he has played with since turning professional,” dugang sa agent.
Ang laing star sa TNT nga si Mikey Williams nga kauban usab ni Pogoy giingong nakadawat usab og susamang offer sheet sa dihang ang iyang kontrata paingon mohupas pipila na ka conference ang nilabay apan giingon nga ang TNT ni-matched sa tanyag nga maoy nagkonsiderar ni Williams nga usa sa mga highest paid PBA players.
“When I reached Roger on the phone, he too, sounded unswayed by the pot of gold he could grab in the Land of the Rising Sun. He was even reluctant to do the interview because he was wary of “baka magalit ang TNT,” suwat ni Sayson sa iyang column.
Sa laing interbyu, gipadayag ni Chot Reyes, usa sa mga executive sa TNT kinsa naka-onleave karon aron iyang matutokan ang Gilas Pilipinas, nga si Pogoy aduna pay kontrata hangtod sa tapos sa tuig 2023.
“But we won’t let it expire. We are working to extend him for two more years,” matod ni Reyes.
Ang kasamtangang kontrata ni Pogoy dili sama sa gitanyag sa Japan apan gihulagway nga dili usab kini barato.
Gipadayag sa kasaligang tinubdan kinsa adunay kahibawo sa sitwasyon, si Pogoy nagdawat og maximum nga sweldo, wala pay labot sa mga bonus ug incentives ug 5-digit nga living allowance matag buwan. (PAC)