Gikuha sa Phoenix Suns si kanhi NBA champion coach Frank Vogel kagahapon aron maoy ihulip sa bakanteng pwesto nga gibiyaan ni Monty Williams.
Kini base sa kasayuran nga gipaabot sa kasaligang tinubdan ngadto sa The Associated Press apan dili magpahingalan tungod kay wala pa kini opisyal nga gipahibawo sa Suns.
Ang 49-anyos nga si Vogel nahimong coach sa Indiana Pacers, Orlando Magic ug Los Angeles Lakers ug karon nibalhin sa Suns.
Iyang sulayan pagtabang ang prangkisa nga makadaog sa unang titulo niini sulod sa 55 ka tuig,diin iyang giyahan ang mga star sa Phoenix nga silang Kevin Durant, Devin Booker ug Chris Paul.
Gipangulohan ni Vogel ang Lakers ngadto sa titulo sa NBA niadtong 2020 atol sa NBA bubble season sa Florida .
Siya adunay 431-389 career record sulod sa 11 ka seasons ug 49-39 nga marka sa playoffs.
Gipalagpot sa Phoenix si Williams niadtong Mayo 14 bisan pa sa upat ka malampuson nga mga season, lakip ang usa ka NBA Finals appearance sa 2021 ug usa ka coach of the year award niadtong 2022.
Apan ang Suns nakasinati usab og duha ka sunodsunod nga makauuwaw nga playoff exit — nabiyaan og 30 puntos sa halftime sa elimination games sa ilang homecourt.
Ang Suns nahigot sa daghang mga kandidato sa ilang hapit tulo ka semana nga pagpangita, lakip ang assistant nga si Kevin Young ug mas dagkong mga ngalan sama nila Nick Nurse ug Doc Rivers.
Kagahapon ilang gipili si Vogel, kinsa naila sa iyang defensive acumen.
Siya usab batid sa pag-coach sa mga superstar nga magdudula, nga nagtabang kang LeBron James sa iyang labing bag-o nga titulo.
Ang bag-ong tag-iya sa Suns nga si Mat Ishbia wala na magpanagana pagpatuman og kausaban sa prangkisa sukad sa iyang paglingkod niadtong Pebrero, gikuha ang serbisyo sa 13 time All-Star nga si Durant sa usa ka blockbuster trade apan bisan pa niini, ang Suns napildi sa ikaduhang hugna sa playoffs batok sa Denver Nuggets. (PAC, AP)