Game one pa man tuod sa ilang best-of-seven games, pero daw og sa nagbuntaog ang mga babag nga sagubangon sa Miami Heat batok sa highly-favored Denver Nuggets ning ilang finals series.
Kini gumikan kay daw sa nadugangan ang problema ni coach Erik Spoelstra sa presensiya ni Aaron Gordon sa ilawom nga bahin.
Kon giunsa pagpahimulos sa Nuggets ang ilang gidak-on batok sa Heat, kini makita sa ilang panag-engkuwentro sa Game One.
Sa sayong bahin, imbis si Nikola Jokic ang mobida sa shaded area nga maoy gipangandaman sa Heat, si Denver coach Michael Malone minaro nga migamit sa 6-8 ug maskulado nga Gordon kinsa yano ra kaayong mobaliwala sa depensa nila ni Caleb Martin, Max Strus ug Gabe Vincent kansang mga gitas-on pulos 6-5 paubos.
Mapugos kining tulo sa pagdepensa sa ilawom nga bahin gumikan kay ang ilang best defensive player nga si Bam Abedayo atoa man maka focus ni Jokic nga anaa permi sa gawas nga bahin.
Ning maong setup sa opensa sa Nuggets nasihag og maayo ang mismatch pabor sa Nuggets.
Gawas sa Gordon factor, laing sulbaronon sa Heat mao ang pick-and-roll ni Jamal Murray ug Jokic nga nagpabiling mahait nga hinagiban sa Nuggets hangtod karon.
Wa pa ni labot sa kickout sa bola ngadto nila ni Michael Porter Jr. ug Kentavious Caldwell-Pope nga maoy tirador sa rainbow territory.
Kabahin sa experimental move ni coach Spo mao ang paghatag og igong oras sa iyang reserve nga si Haywood Highsmith kinsa mitali og 18 puntos.
Nibilib man tuod siya sa 6-7 nga small-forward apan ang nahimo niini wa makatapak sa kapugdol sa kagabhion nila ni Jimmy Butler, Max Strus ug Caleb Martin.
Sa laktod nga pagkasulti, way departamento nga gidag-an ang Heat sa maong panagsangka.
Pero ang nakahatag og tanghaga sa Miami Heat mao ang wala paggamit sa beteranong si Kevin Love kinsa adunay igong eksperiyensiya sa NBA Finals ug aduna na usay titulo ubos sa Cleveland Cavaliers niadtong 2016.
Si Love, 6-8, makaabag unta sa depensa sa Miami nga mahimong ika-matchup ni Gordon o bisan ni Jokic sa low post.
Naobserbahan nga sa playoffs, wa kaayo kahatagi og oras si Love ni coach Spo.
Kini gumikan kay wala mohaom ang estelo ni Love sa sistema ni coach Spo nga mao ang run-and-gun play ug moving without the ball.
Sukwahi sa naandan ni Love kinsa ganahan kaayo nga moduwa sa low post.
Yes, duna man tuoy rason si coach Spo kon nganong di kaayo siya kombensido nga mogamit sa opensa ni Love pero sa eksperiyensiya ug sa gidak-on niini mahimong mapuslan sa Miami ang depensa ni Love ilabi na sa ilawom nga bahin.