Traysikol drayber gidakop samtang namasada sa Dakbayan sa Talisay human siya nailhan nga maoy nilungkab ug nikawat sa kwarta ug manok sa usa ka sanga sa Chooks To Go niadtong Biyernes sayo sa buntag, Hunyo 2, 2023.
Si Police Lieutenant Colonel Randy Caballes hepe sa Talisay City Police Station niila sa suspek nga si Junie Henon Bacalso, 41, taga Purok Manga, Upper Barangay Mohon, sa maong siyudad.
Nailhan siya pinaagi sa footage sa closed circuit television (CCTV) sa establisemento.
Gilungkab sa suspek ang maong tindahan sa Rabaya St., Brgy. Tabunok ug gikuha ang usa ka manok nga hilaw pa nga nagkantidad og P135 ingon man liog sa manok nga hilaw pa gihapon nga mobalor og P105.
Gawas sa manok, giingong lakip nga gikuha sa suspek ang halin nga dul-an sa P40,000 ug kwarta nga pangsukli nga mokantidad og kapin sa P1,300.
Matod ni Caballes nga si Bacalso nilungkab sa tindahan sayo pa kaayo sa buntag ug alas 7:30 sa buntag na nadiskobrehan sa Biyernes, Hunyo 2.
Nakita siya sa CCTV sa tindahan busa nailhan siya bisan nagtaptap.
Si Lelith Dagasdas, representate sa tindahan nga gilungkab, nidangop sa police station aron ipahibawo ang nahitabo.
Daling nailhan sa kapulisan ang suspek ug gilusad ang usa ka hot pursuit operation ug sa alas 5:30 sa hapon sa samang adlaw napusasan si Bacalso.
Nabawi gikan kaniya ang kwarta nga mokantidad og P4,700, shirt nga gray ang kolor, jersey ug tube mask nga maoy gisul-ob niini sa paglungkab.
Gihikay na sa kapulisan ang kaso nga robbery batok sa suspek. / BBT