Napasaka na sa kapulisan sa dakbayan sa Naga niadtong Biyernes sa hapon, Hunyo 2, ang kasong rape batok sa lima ka mga suspek sa pag gang rape sa usa ka 16 anyos nga dalaga nga tinun-an sa Grade 10 sa usa sa mga tunghaan sa siyudad.
Matod sa hepe sa Naga City police station nga si Police Lieutenant William Homoc nga lima ang ilang napasakaan og kaso sa Provincial Prosecutors Office.
Gipasabot ni Homoc nga lima lang ang nailhan nga maoy positibong gitumbok nga nakahilabot sa biktima.
Atol sa interview sa sibyaanang dyHP ug Superbalita Cebu kang Homoc, siya nibutyag nga sa lima nga gipasanginlan, usa kanila niluwat og extra judicial confession diin nahatag niini ang tanang mga impormasyon sa paglugos sa biktima.
Duha usab ka laing saksi nihatag sa ilang mga pamahayag nga nagtumbok gyud sa lima nga maoy nanamastamas sa biktima.
“Lima gyud ang gikiha nato. Bahala na ang korte nga mo determine as long nga amo siya (mihatag og extra judicial confession) nga giapil sa kaso,” matod ni Homoc.
MIASOY
Gibutyag sa usa sa mga suspek ang detalye ug kinsa ang katapusan nga nihilabot sa biktima.
Sigun sa pamahayag sa mga saksi nga atol sa debut party nga gitambungan sa biktima ug sa mga suspek, nanag-inom sila sa ilimnon nga makahubog nga gisagol ang tulo ka mga klase sa ilimnong makahubog.
Wala pa matagbaw, giusban pa nila kini hangtod nga naabtan sila og alas 2 na sa kaadlawon pagka Mayo 26, 2023.
Dugang ni Homoc nga sigun sa mga tawo sa birthday party, nanglakaw ang mga suspek sa maong oras uban sa biktima hangtod nga pipila ka minutos, gipangita na ang dalaga tungod kay wala mauli sa ilang panimalay.
Hangtod nga napalgan ang biktima sa dakong tangke sa tubig nga maoy nag supply sa tanang residente sa barangay nga luya na human giingong gipanamastamasan.
Tungod sa mga pamahayag sa mga saksi ug pagtug-an sa usa sa mga suspek, gihulagway ni Homoc nga lig-on ang ilang gihuptan nga kaso batok sa mga akusado.
Gipaabot nalang nga mogawas ang warrants of arrest batok sa mga suspek nga nagpangidaron og 15 ug 17 anyos.
Samtang mihimo usab ang kapulisan sa dakbayan sa Naga og drug symposium sa barangay diin namuyo ang lima ka mga suspek aron edukahon kon unsa ang epekto sa ilegal nga drugas.
Sunod nga ipaubos sa seminar ang mga tinun-an sa high school unsaon nga dili makahimo og krimen pinaagi sa paglikay sa paggamit sa ilegal nga drugas.