Ang Package 2 sa Cebu Bus Rapid Transit (CBRT) project anaa na sa Detailed Engineering Design (DED) stage nga gikatakdang mahuman mga Hunyo hangtod Agusto, sumala sa gipahayag ni CBRT Project Manager Norvin Imbong.

Ang DED maglakip sa mga plano, tukma nga mga drowing, espesipikasyon, mga taho, ug mga kalkulasyon sa disenyo sa proyekto ug karon gidumala sa usa ka Koreanong kompanya, matod ni Imbong.

Sa pagkakaron, wala’y bidding alang sa kontraktor nga motrabaho sa Package 2, apan ang procurement gitakda sa katapusang quarter sa 2023 diin ang petsa sa pagsugod sa konstruksyon gitarget sa 1st quarter sa 2024.

Ang Package 2 gilangkuban sa duha ka rota, usa gikan sa Provincial Capitol paingon sa Cebu IT Park ug usa gikan sa Cebu South Bus Terminal paingon sa South Road Properties.

Kini naglangkob sa Intermodal Corridor ibabaw sa Natalio Bacalso Avenue, Escario St. – Gorordo Ave. - Archbishop Ave. - Cuenco Ave., SRP ngadto sa Mambaling corridor ug sa SRP terminal ug depot. Ang kinatibuk-ang gitas-on sa koridor gibanabana nga mga 10.65 kilometros.

Sa pagkakaron, gibanabanang 21 porsiyento sa Package 1 sa CBRT project, nga naglangkob sa 2.38 kilometros gikan sa Cebu Provincial Capitol hangtod sa Cebu South Bus Terminal, nahuman na, tulo ka buwan sukad gisugdan ang pagtukod.

Ang Package 3 maglangkob sa 3 ka feeder lines nga adunay bus stops ug 2 ka terminals alang sa feeder lines ug adunay gibanabana nga gitas-on sa corridor nga 22.1 kilometros. / RJM