DAKONG buhi, wala nawala ug nakauli na sa iyang pamilya ang 56-anyos nga si Rodrigo Cadungog, kinsa giingong na-missing human nga mitabang sa batan-ong taga Calinan nga na-missing ug namatay nga si Dennis Roy Panzan.
Gipakita ni Talomo Police Station Commander Police Major Noel Villahermosa sa usa ka video nga kauban niya ang 56-anyos nga si Tatay Rodrigo.
Suma ni Cadungog, nilakaw siya'g alas 7 sa buntag niadtong Mayo 30, 2023 padulong sa Compostela, Davao de Oro.
Gisaysay niini nga wa niya makontak iyang pamilya kay nahibilin ang iyang cellphone sa balay.
Miuli siya'g Davao City human nga gipahibalo siya sa iyang pamilya ug higala nga gi-report siyang missing.
"Furthermore, we understand everyone's frustrations and heightened emotions right now but please refrain from using offensive comments, profanities and foul language or spread unreliable informations on social media because it will not help in any on-going investigation at this point in time,” saysay sa pamahayag ni Major Villahermosa.
Una niini, nagkadaiya ang nanggula nga espekulasyon sa mga netizens sa pagka-missing ni Tatay Rodrigo.
Unang pagduda sa mga netizens gidagit ang panday nga 56-anyos aron suma pa di kini makabutyag sa mga posibleng gisaysay ni Dennis Roy Panzan kaniya.
Si Panzan mao ang taga Barangay Calinan nga gidagit ug miingong gikulata siya, gipuposan, gitaptapan og packaging tape ang nawong, ug naka-ikyas ug nakapangayo og pakitabang sa mga taga Barangay Matina Pangi.
Si Cadungog ang unang naka-rescue kang Parzan ug gidala niini kang Barangay Kapitan Benjamin Badon, dayon gidala ni Kapitan Badon sa Talomo Police Station, apan namatay si Parzan dihang miatubang na sa mga pulis sa Talomo PNP.
Si Panzan maoy usa sa mga nanga-missing sa Calinan, Davao City human sa hitabong paglugos ug pagpatay sa batan-ong architect nga si Vlanche Marie Bragas.