Gidunggab sa liog kritikal

Kritikal ang usa ka 19 anyos human dunggaba sa liog sa buak nga botilya sa beer samtang nagsayaw sud sa usa ka bar sa Gen. Maxilom Ave., Barangay Kamputhaw, siyudad sa Sugbo, alas 2:00 sa kaadlawon sa Dominggo, Hunyo 4, 2023.

Si Police Staff Sergeant Joel Ian Lamela sa Abellana Police Station 2, niila sa naangol nga mao si Ronemart Ytang Pamalan, 19, taga dan V. Rama, Ingles sa Barangay Guadalupe.

Matod ni Lamela, ang komusyon nahitaho sa Uptown Vibes sa Gen. Maxilom Ave.

Ang suspek sa pagpanuggab mao sila si Erwin Labating Ricafrente, 2, ug Recil Sanchez Romano, 24, pulos mga molupyo sa Sitio Putol Dalan, Brgy. Lahug, siyudad sa Sugbo.

Kining duha ka live-in partners ang tingkagol na karon sa selda sa Abellana Police Station human gipangdakop human sa panghitabo pinasikad sa usa ka citizens arrest.

Nasayran nga sa wala pa ang hitabo, si Pamalan nagsayaw sulod sa disco diin nagsayaw usab niadtong tungora ang duha ka mga suspek nga sila Ricafrente ug Romano.

Tungod sa kahubog, samtang uban sa grabe nang kiay sa tunga sa diskohan ug wala damha nga nasaghiran sa biktima si Ricafrente hangtod na nga nagkainitay ang matag grupo.

Tungod sa maong kagubot, si Romano mibalik sa ilang lamesa nga giimnan ug mikuha og botilya sa beer ug gibuak ug gihatag ngadto na kang Ricafrente aron pagdunggab sa liog sa biktima.

Si Pamalan daling gidala sa tambalanan ug atol ning pagsuwat, padayon pa nga giobserbahan.

Samtang, ang duha ka mga suspek gikatakda nga pasakaan og kasong frustrated homicide nunot na sa krimen nga ilang nahimo.